家傳之「保」｜黃翠如賣魚成朝得$200生意　 蕭正楠落場幫拖10分鐘賣過千

黃翠如將為周日（5日）首播的真人騷《家傳之「保」》打頭陣，走到海鮮檔親身體驗黃爸爸昔日打工日常。為了秉承爸爸昔日凌晨兩三點便起身開工的傳統，翠如晨咁早凌晨四點便精神抖擻開工，除親力親為為海鮮鋪好「冰牀」、又落手落腳撈魚、劏魚及叫賣，可惜落力了一個早上，仍只做得200蚊生意，遭專誠受外母所託帶同「媽媽牌愛心水餃」前往探班的蕭正楠為之汗顏：「嘩！成朝做咗200蚊生意呀？喲～～好多喎咁樣，你對唔對得住青姐（海鮮檔老闆娘）呀？」之後還自告奮勇「救妻」：「我同你落去，我幫你追番啲生意先。」當阿蕭一到，翠如即秒變活潑，二人以「阿姐」、「哥仔」互相稱呼之餘，仲要笑到走晒音，互耍花槍。

自信十足的阿蕭，一落場除落力大聲叫賣，又落足嘴頭賣口乖：「一睇就知你靚仔啦」、「好似你咁強壯喎」、「標水喎呢隻（象拔蚌），新鮮喎」，還主動減價以退為進冧客：「多謝老細，收平你廿蚊先」，短短十分鐘已收獲逾千元港元生意額，獲讚是「賣魚嘅材料」。

突襲送老婆驚喜的阿蕭，一見到翠如即笑個不停，並戲精上身問翠如： 「阿姐有冇咩靚魚，執條嚟。」面對老公的佻皮、翠如則扮發火謂：「你一點半先嚟，你點樣照顧頭家㗎，豈有此理！」被罵的阿蕭則全程笑到執到金咁款、相當璨眼。但當面對努力劏魚的翠如，阿蕭即回復一本正經，全程望到實之餘、還為愛妻吶喊助威：「我係有啲擔心嘅，因為佢屋企唔會揸刀，嗰把魚刀又唔係講玩啦，仲要喺鰓位、魚肚位𠝹嚟𠝹去，我見到其實都有啲擔心：『你都幾危險㗎喎』。」阿蕭望住翠如劏魚個樣，十足在看恐怖片一樣，但當見到翠如手起刀落，阿蕭又開心到變腰果眼，名副其實「愛妻號」。

廿四孝老公兼女婿阿蕭另外又受外父所託，「黃爸爸上身」與翠如大玩「傳承度測試」快問快答，兼朗讀黃爸爸寫給翠如的家書；翠如聽阿蕭朗讀爸爸家書期間還全程淚流不停。