TVB娛樂訪談節目《一周星星》今晚（9日）播出的一集，請來劇集《夫妻的博弈》五位主演高海寧、馬國明、郭柏妍、何廣沛與鄧智堅擔任嘉賓，接受主持許文軒訪問，大談拍攝趣事與鮮為人知的幕後點滴。
高Ling於劇中飾演「姜幸如」，一個原本在家庭和職場受盡欺凌，後來憑預知夢改寫命運、逆襲成女強人的角色。被問到拍攝最大挑戰時，高Ling透露其中一場戲「冇咗半條人命」：「就係我發現郭柏妍同張頴康真係喺張牀度！」她直言現實中若發現最愛的男人與最友好的閨蜜上牀，還要被辱罵「你都就嚟死啦」等惡毒說話，那種痛苦難以想像：「所以嗰場戲好真情實感去做，中間有一Part我要打你（郭柏妍）個頭，我係冇留力㗎，因為真係好傷心呀，傷心到嗰下所有情緒爆發出嚟。」不過郭柏妍卻笑言當時演得太投入，完全沒有被打的記憶：「我已經唔記得嗰一吓畀人打得好勁。」
節目設有「獨家考古」環節，重播何廣沛在《超時空男臣》的咀戲時，高Ling突然踢爆：「你呢套劇（《夫妻的博弈》）同另一個女仔（指游嘉欣）有好多錫戲，仲拍咗好多Take添！」何廣沛即尷尬回應：「劇情需要！」高Ling秒回：「梗係劇本需要啦，唔係你以為咩呀？」引得全場爆笑。
郭柏妍重看自己當年擔任《#後生仔傾吓偈》嘉賓的片段時，主持許文軒乘機問她可有後悔在節目中自爆是A0（從未拍拖），她爽快回答：「冇喎，我講事實呀。」但說罷隨即尷尬地稱：「死啦，好難搞呀」、「我冇講大話㗎！」引得全場大笑，令她更加尷尬到想搵窿捐。此時高Ling「緊急救場」，只說了一句話便幫郭柏妍化解尷尬，盡顯前輩風範。
「你問我答」環節中，高Ling大方談及擇偶條件，承認公司有很多好男人，但自己不想跟行內人拍拖：「原因係我好想喺工作之餘嘅時間，想做番一個平常人。」此時節目突然播出洪永城預先錄下的片段，他自爆曾做媒人，介紹了幾位男性朋友給高Ling：「唔知道依家發展如何呢？好似麻麻地，但唔代表佢（高Ling）要求非常之高。」高Ling聽後即睜大雙眼，緊張澄清：「絕對冇啲咁嘅事！」更即場稱馬明可以做證人，場面搞笑。
孔德賢問到先天有聽力問題的何廣沛，拍攝時如何克服障礙，他透露平時會戴助聽器，但拍劇時無法佩戴，若對手站得較遠，他便聽不到對方說話：「所以我拍戲嗰陣要好專心，唔會玩任何嘢，仲要背埋人哋啲尾句，背晒所有嘢囉。」其專業態度獲全場讚賞。
被問到若真的發了預知夢，最想抹走哪一段黑歷史時，眾人異口同聲表示「冇」。此時節目播出鄧智堅加入無綫初期，經常搞笑扮女人的片段。他坦言無論劇集或節目，經常被公司派演與自己性格反差極大的角色，包括女人、殺人犯或年老角色：「反而幾開心」、「搵番做演員嘅樂趣好重要。」展現出對演戲的熱愛與專業態度。
