世上有好多事情都不是有心安排，甚至是想都未曾想過，但又會成世人跟住你，真不知是莫奈何還是可奈何。好像畫漫畫，當年羅斌先生要在《新報》副刊加入漫畫，叫我去畫。唉，畫漫畫咁難嘅工作好攞命，我只有說：我唔畫。羅先生意志堅決，我也意志堅決唔畫，只是介紹畫家給他，一介紹就是三個漫畫家：香山亞黃、王司馬、王澤，就此甩身，令我過了安樂一點的十年。只可惜卻是好景不常，《新知》周刊李金石忽然要我畫漫畫，大佬，老闆叫我都唔畫，明知自己並冇才智，咁傷腦筋嘅嘢好難鯁㗎，唔做！李金石話：「好易做㗎咋，你畫公仔，有人寫橋，得未？」哦，淨係畫公仔就無所謂，畫囉。慘，從此走上不歸路，衰乜嘢？衰多手囉，老編俾橋我睇，跟住條橋嚟畫，做吓、做吓，會發現如果將古仔改少少，張漫畫所收效果會更好，於是久不久又改吓橋，編輯、作者都懶得理會，咁就變成「偶然」嘅習慣。《東方日報》開鑼，周石找我畫漫畫，我說除非有人寫橋，否則不畫了。結果程雪門寫橋，董培新畫畫，誰知我這不安分的人改橋習慣已成，「咁樣結局咪仲好？」又去改人橋，今次大劑，程雪門一怒罷寫，周石話：「培新哥，只有你頂上啦。」大劑，從此橋都要度埋，點知卻是禍不單行，一日，羅老闆叫我入房，佢話：「《東方日報》段橋幾好呀。」跟住就俾個版樣我，「六格漫畫聽日見報。」大煲！「鞋底秋」就係咁誕生，由此個腦好唔得閒，日日要度橋，衰在愈度愈多，多到每日十條以上嘅橋，一個星期有二天係十二、三條，慘，持續二三十年，現今還未能完全甩身。