張敬軒（軒仔）早前獲邀成為枇杷膏代言人，並為廣告一人分飾兩角，扮演行山友同埋自己個肺，盡情發揮佢搞笑兼扮嘢天份。
廣告中，「行山軒」被一個「小廢青」拖住隻腳，而呢個人經常打機唔願瞓、由朝到晚吹住冷氣，搞到個人又乾又虚，仲成日吸埋啲廢氣，最後發現「小廢青」原來就係佢自己個肺！軒仔飾演嘅「阿肺」着住彩色波點睡衣、bob頭加大眼鏡，造型極具娛樂性。再加埋軒仔七情上面嘅演技，難怪網民紛紛都話軒仔係被歌唱事業耽誤咗嘅諧星。
近年軒仔積極嘗試扮演不同角色，扮嘢嘅功力出神入化。於網絡及演唱會上，曾化身「降兩度」同「火龍果」，引起網民熱議。
軒仔今次拍廣告亦加入唔少搞笑元素，「呢個品牌相信香港冇人唔識，佢係一間老字號，但亦同時與時並進，能夠捉到時下流行元素放入廣告入面，所以我好鍾意今次廣告個概念，廣告除咗有搞笑效果，其實亦好配合到佢哋個產品。我仲可以想像到如果我有個仔，一定似足入邊個小廢青！」
軒仔又表示唔怕被定形為諧星：「其實都係想透過唔同方法俾唔同年齡層嘅觀眾認識我、我嘅音樂同演技。」