ERROR 2024年首支團歌《無敵聖衣》，歌曲內容是想分享接受失敗的心態猶如一件聖衣，是一種力量加持，令自己專注，不斷尋求進步方法，挑戰不可能的事情。即使失敗了，都可以穿上聖衣為自己戴上主角光環，打做屬於自己的成長曲線。
歌曲大玩J-Rock，就連MV都十足十日本動漫，原來都是忽發奇想的一次創作。193道：「MV有少少趕，我要出trip工作，返到嚟冇時間拍MV，於是同陳考威錄完音，傾開MV要點拍好，傾傾吓見到一啲動畫reference。我哋做呢首歌嘅時候，都想有啲日系動畫主題曲嘅感覺，所以就諗，不如用日系動漫風畫出嚟。我哋上網搵咗好多reference，然後搵咗之前為我哋嘅節目《花姐ERROR遊》同《辣王傳》畫過動畫嘅團隊，幫我哋製作咗呢個MV，都幾滿意。」
MV唔單只有動漫feel，而且仲有打機感覺，原來當中都有寓意，阿Dee道：「以前打機係一關關一層層咁上去，而我哋用呢個去比喻每一個人要go through（跨越）嘅困難嗰個過程，就好似打機咁，要一層一層同魔王對戰。打輸咗？唔緊要，按Countinue，再復活再打，我哋就係用咗呢個角度去表達《無敵聖衣》裏面所講嘅堅持。」
今次ERROR都給予不少意見，務求令MV不但保留了團隊的搞笑風格，同時也達到點題效果，好似在MV最後，ERROR走到final stage，穿上聖衣表演，還有在MV中出現的濟典娜，便是度身訂造為一眾404而構思，相信看過MV就會對濟典娜的出現過目不忘。除此之外，MV整體風格，也曾作出多番調整，阿Dee透露：「好似我哋嘅角色造型，起初有啲次美國漫畫風，後來再改動成為日漫，同埋成個MV嘅graphics都有作出調整，做過好幾個版本，係兩種氣氛嚟，但最後揀咗呢種線條比較簡單，但走出嚟效果會比較cute、親民，容易入口啲嘅表達方式，而家成品同音樂可以扣埋一齊，所以我好滿意。」
如果一直有追開ERROR大小事情的404忠粉，相信睇《無敵聖衣》MV時，也會有無限驚喜，因為當中加插了大量ERROR從出道至今的事蹟在其中，就連Poki看過MV也道：「睇完MV真係好多回憶，好似笨豬跳（MV中變了跳崖），就令我諗起當日《花姐ERROR遊》嘅點滴，真實做唔到嘅時候，就喺呢個動漫MV做到了。」而這個MV的打大佬故事，也讓Poki感性地分享道：「希望我哋四個人，可以力挽狂瀾，慢慢攀上去，一開始，就好似MV入面，大家只係著住紙皮衫，到最後終於有件無敵聖衣，就係慢慢累積level up，同我哋事業一樣。」
