伍詠薇及蘇皓兒（Chloe）主演的單元《雙魚》昨晚（7 日）播出結局篇，渺渺離家出走，芬姐在金宵大廈出現異象，回到女兒受傷當日，憶起原來用鏹水意外淋到渺渺的是自己本人心感愧疚，開Live 道歉兼四出尋女，兩母女最終在十字路口相遇，芬姐苦求女兒回家不果，為將自由送回給女兒，竟閉眼衝出馬路企圖自殺，最終被車撞到致終身殘廢，由被照顧者變成照顧者的渺渺，全程享受控制權，並反利用傷殘的母親作「賣慘」籌碼；在賣慘節目中高唱溫情歌曲的渺渺，配以溫馨及虐待交錯的母女今昔相處畫面，以及伍姑娘看似幸福安慰、但又夾雜痛苦無奈及默默承受的表情，結局相當暗黑！
網民對劇集結局有三大謎思，姑娘最後係扮內疚定真心悔改？渺渺係咪黑化咗？最後首歌咩意思？監製葉鎮輝（阿細）說：「芬姐是真心愛個女，亦都知錯，奈何個女已經『成長』變成另一個自己。殘廢後的芬姐要依賴個女生活，亦都甘願接受阿女控制。至於渺渺就一定是黑化了，很多人覺得點解渺渺唔虐待番芬姐，係咪去得唔夠盡？事實係渺渺都唔可以冇咗芬姐，佢冇辦法自己一個生活，佢其實都係愛芬姐。兩母女就繼續『相愛相害』，大家之間有好多恩怨都被迫綁埋一齊。」
至於劇集尾段出現的「溫情歌」，阿細解釋：「有觀眾聽到首歌以為係大團圓，其實睇真啲，渺渺唱歌時，腦海的畫面全是芬姐虐待她，她其實沒有原諒芬姐。」阿細更提示渺渺兩句對白：「第一是『施比受更為有福』呼應賣慘對施恩的人的意義，亦想表達阿媽一直照顧阿女『更為有福』；二人關係逆轉，渺渺成為照顧者，所以就『有福』了。另一句係『我哋都做咗選擇』，阿女由舉報阿爸開始，就選擇要跟阿媽，所以冇資格去怨。同樣阿媽選擇了犧牲自己被車撞去換個女返來，佢都冇資格去怨。」
