出道四年的「緊張大師」黎展峯（Andy），日前迎來人生第一次音樂會！今次跟張馳豪（Aska）孖住上舉行《Andy X Aska PLAY》音樂會。這邊廂Andy在台上自彈自唱兼大曬健身成果，那邊廂台下粉絲卻送咗100包印尼撈麵，搞到他爆笑謂：「keep fit一個月即刻破功！」
人生首個音樂會，Andy坦言緊張到爆，「好緊張！因為屬於自己第一個show，好多嘢都想準備到最好，再加上我係一個鍾意諗好多嘢嘅人，所以好容易令到自己騷前好大壓力！」這次音樂會，由選歌、rundown到styling，Andy都落力參與，他表示：「再加上每日去練歌練琴、做gym，係有啲chur，不過好值得！」果然完美主義者上身！他更指自己「諗嘢多過食飯」，好在音樂一響即刻放鬆，「不過開show後，聽到大家嘅反應，即刻令到我放鬆晒，不斷話俾自己聽，要享受呢一場show。」
首次開show，Andy坦言沒有蝦碌事，反而有不少爆笑時刻，「最深刻就係收咗100包印尼撈麵！我本身好鍾意食，但為咗呢場show，努力keep fit咗一個月，但因為開show前要谷肌，我特登食咗印尼撈麵攝取碳水，點知show day當日，fans為咗慶祝我good show，就送咗成100包印尼撈麵俾我！」他笑言雖然很感謝粉絲的心意，不過他搞笑表示：「早知話自己鍾意食魚子醬啦！」
至於最感動、最喜歡的一part，Andy表示在唱《免費升級》這首歌，「呢首歌陪伴住我或者好多人經歷低潮，能夠帶住呢隻歌，去到一個更大舞台表演，真係好感動！亦提醒住自己，要繼續更加努力，每一次都要俾大家見到一個升級咗嘅Andy！」
