踏入2026年，「唱作王子」馮允謙（Jay）喜事連連。元旦日，他於叱咤樂壇頒獎禮首次奪得男歌手金獎，首個個人戶外演唱會「BLUE MOON WANDERLUST 馮允謙演唱會2026」亦於今日（17日）起在西九文化區竹翠公園連續兩日舉行。與此同時，全新專輯《FRAGMENTS OF MY MIND》亦於今日正式面世。
Jay表示，籌備新專輯時沒有特定主題或連貫要求，「好想隨意發揮，想寫乜就寫乜。結果發現每一首歌都有關於我嘅人生同埋成長，所以最後決定以《FRAGMENTS OF MY MIND》作為專輯名。」值得一提的是，專輯隨碟附送一支畫筆，讓歌迷參與創作，他說：「可以喺碟內嘅紙、相冊或者歌詞集上寫低想法，發揮想像力，或者寫啲想記低嘅事。」
去年Jay創作力十足，推出多首中文及英文歌曲，幾乎全由他親自作曲，並參與部份歌曲填詞和MV創作。談及自己的繪畫天份，他自信表示：「早前返加拿大屋企搵到一個箱，裏面有好多畫冊，原來我細個對畫畫都幾有興趣，長大後興趣去咗音樂方面。當時我會畫啲天馬行空、好奇怪嘅嘢，雖然畫功唔係好叻，但好有想像力，細細個有呢啲興趣和培訓。」他透露，這份想像力也延伸到音樂作品和MV創作，例如《See Through Ya》MV，他建議採用stop motion（定格動畫）手法，使用大量照片、圖畫及素描，部分靈感來自他自小對繪畫的興趣。
談到歌迷創作，他笑言家中擺放了許多以自己為題材的畫作和擺設，「朋友嚟到我屋企，會以為我係自戀狂，其實都係歌迷畫畀我，佢哋真係好sweet，好多謝佢哋。」他期望透過專輯及附送畫筆，讓歌迷能與自己一起參與創作，分享想像力與靈感。
