馬國明今日出席譚仔雲南米線「港式咖喱湯米線」發布會 ，視帝穿上譚仔制服化身店長，因為今次活動主要宣傳新推出的咖哩湯米線，所以馬明頸上仲印有咖哩雞唇印，「今次第2次合作，7年前幫佢哋拍廣告，當時好努力學譚仔話，練足3日，不過因為太耐無搵我，我都忘記點講譚仔話。」
馬明日前喺IG分享一張大頭自拍照，有眼利網民發現，馬國明頸部出現一大撻「瘀痕」，疑似是與太太湯洛雯的「恩愛痕跡」，原來全是宣傳效果，「都係為咗宣傳，張相出左咗之後啲朋友都問我有無事，叫我小心食嘢，但亦大部分人會想到其他嘢，不過無咩所謂，我就無諗得咁複雜，而太太都無咩反應，佢都知道係宣傳，不過現實中太太真係唔會咁做，因為係人都知我係佢老公，唔使靠呢樣宣洩主權。」
近日難得不用開工，既可同太太拍拖又可以搵真錢，「近日未開工，所以我哋都成日出街拍拖，又唔使度期接唔同工作，我都想同太太一齊拍廣告，所以近排搵錢先，唔關生BB事，唔單止要養老婆，父母都要養，生BB就順其自然，太太唔使特別調理，佢向來都好注重健康，總之大家保持健康體格。」網民笑言馬國明婚後愈來愈殘，而湯洛雯則愈來愈靚容光煥發，他笑言不太緊要，最緊要老婆靚。
