兩兄弟以歌曲送給母親。
陳敏兒今天舉行安息禮，兒子廖文哲及廖文信於緬懷環節，細訴與母親的回憶。率先分享的二仔廖文信，全程以笑容道出與母親的溫馨相處時刻，他先多謝媽媽很多朋友和支持她的人出現，令他十分動。他說：「喺籌備呢個安息禮過程，有好多好好嘅媽咪嘅朋友，同埋好多親人幫我哋一齊去預備，俾我深深感受到，要籌備一個安息禮一啲都唔容易，所以我發現當初我爸爸（廖啟智）走嗰陣，我媽媽真係好Tough嘅一個人，因為佢喺咁悲痛嘅情況，都可以一個人Handle咗好多嘢。」
二仔文信
文信續謂認識陳敏兒的人，都知她是一個很堅強的女子，但同時她都有依靠別人的一面。文信說近日看回舊照片都有很多的回憶：「我平時同媽媽嘅相處其實都好簡單，我哋可能喺屋企梳化度挨住大家，一齊去睇電視、YouTube、劇。我哋出街有時佢都會拖住我攬住我行，然後我病咗嗰陣，佢都會好照顧我，好擔心我，會搵好多唔同嘅方法，快啲去務求令我好舒適度過我嘅病。之前佢仲精神嗰陣，都會揸車車我返工，我哋會一齊喺車度傾好多嘢，呢啲都係雖然好平淡，但好珍貴嘅回憶。」
文信表示當年爸爸離去，令他發現世事難料，「我爸爸本身好似好健康咁，但突然喺好短時間離開，俾我知道親人唔可以話一世陪住你，係會有離開嘅時間。因為唔想有遺憾，所以我喺爸爸走咗之後，搵時間去陪我媽媽，製造多啲回憶。之前我喺澳洲讀書畢業，全家嚟咗探我，我哋去咗個Road Trip，有一晚我阿媽突然好想去睇星，我就車咗佢出去睇，喺湖邊望住，真係好多星，睇到好清楚嘅銀河系。」
文信坦言這事對他們來說都好深刻，「仲記得我阿爸嗰陣好唔滿意，因為佢瞓咗我哋冇叫佢，我哋就自私去睇，佢都提咗好次，但都冇辦法啦，之後香港再補返啦，但之後都係冇機會同佢去睇返。」由於敏兒說很掛念當日的星空，想再看一次，他們於去年落實去蒙古，雖然當中遇到敏兒要做一個手術，感恩最後都成行。「我哋真係喺蒙古嘅草原望住一片夜空，見到銀河系，清晰到連衛星都見到，我媽都好開心，我都好開心！咁呢件事令到阿媽同我講，佢已經冇遺憾，因為佢已經睇到佢最想要嘅嘢。」
文信提到母親教他很多事情，令他不要跟身邊的人留下遺憾，當中最深刻的「五道」，分別是道謝、道愛、道歉、道諒和道別。「我覺得喺在世時一定要成日同至親嘅人多啲分享呢啲說話，因為你唔講，人哋係唔會知道，當佢走咗，你就冇機會同佢講，咁就會好多遺憾好辛苦。所以喺媽媽病緊嗰陣，我都同佢不斷咁樣講。」文信表示即場實踐讓大家看：「首先我要多謝我媽媽，喺我病同有困難嗰陣，佢好無微不至咁照顧，同埋開導我，我好愛佢，可以做到佢個仔。我會想同佢道歉，我有時會冇耐性；我亦都會原諒佢，細個可能冇乜時間去陪我哋；最後係再見啦媽媽，我同哥哥學習媽媽嘅愛，將佢嘅愛延續落去，繼續幫助有需要嘅人。接下來想拜託咁多位媽媽嘅好友，多多去關照我哋，雖然我哋依家已經好大個，但我仲覺得自己係個低級大人，拜託咁多位高級大人去睇住我哋。」
大仔文哲全程戴口罩，他接住文信分享：「Hello，我分享冇咁詳盡，我純粹想多謝我媽媽。」一開聲已忍不住哽咽落淚的文哲續說：「因為佢話俾我聽咩係無條件嘅愛，細個嗰陣佢教我，其實做人唔需要Fulfill任何期望，只要活得開心嘅人生……呢樣嘢我慢慢學緊。我細個嗰陣相反同佢無所不談，我係有乜就同人分享，但大個之後，各種原因、生活習慣，唔係太過合適，反而我同佢Keep咗距離……但我好多謝佢入院之前嗰個禮拜，我同John（文信）有Keep Contact，我多返來陪佢，喺佢最後清晰嘅一刻，我又講到我要講嘅嘢。」文哲全程傷心分享，文信都在哥哥背後輕輕安撫拍背，文哲最後亦謂好多謝弟弟。簡短分享後，文哲以歌曲代替說話，獻唱送給母親，並由文信結他伴奏。唱畢後他說：「多謝媽媽，多謝你多謝我話我係你老師，你都係我老師！」
大仔文哲傷心分享，文信在後安撫哥哥。
