陳毅燊（ANSONBEAN）明天（22日）22歲生日！一班豆粉秘密為他準備了生日應援巴士，更聯同他經理人製造驚喜。當天經理人假裝為ANSONBEAN安排了訪問，並與他一同到中環碼頭，當行至巴士旁邊，ANSONBEAN被問到：「巴士上嗰個人咁似你？」他轉頭一看即被嚇呆！ANSONBEAN笑指：「因為冇乜預計過呢件事會發生，所以表現得比較呆滯，因為我正在準備緊表演嘅工作，個人係好緊張同死板，而我嚟緊嘅行程中都冇乜好生動嘅事情發生，所以突然見到呢件咁生動嘅事，係好震驚嘅！」
由於ANSONBEAN過往的生日也會遇上不快事，令他有「生日恐懼」並覺沒有甚麼值得慶祝，但今個生日卻令他頓悟人生，他感動說：「我一向都覺得生日係好悲傷嘅，但係今日咁大份禮物，真係令我好感動，多謝豆粉去籌備呢份生日禮物。我覺得生日係將除咗喺年齡加咗一個數字，仲會令到個人『重』咗，一到生日就會有壓力同負擔，但今日發現生日都有佢嘅樂趣！多謝豆粉陪我一齊行呢條表演嘅路，有時我都會有迷失，但一諗起豆粉嘅支持同愛，我就會有動力，我應承大家，我會繼續逼迫自己，做多啲好嘅作品俾大家。」
