香港明星足班隊成員衛志豪、莫家淦、張智軒、潘梓鋒、羅鈞滿和伍偉樂組成的「老六兄弟」，昨晚（11日）接受薛家燕的電台節目錄音訪問，途中譚詠麟（阿倫）突襲錄音室，令到全場驚喜大叫，笑聲不絕。
阿倫力撐「老六兄弟」同時，被家燕姐追問他和和老友陳百祥（阿叻）因明星足球隊「分家」問題傳鬧不和一事，「聽聞明星足球隊分咗兩隊？」阿倫直認不諱：「真係有呢件事，空穴來風必有因。」是否兩隊作風不同？阿倫也直言：「出面啲人成日都問我係咪同阿叻唔啱？點會唔啱呀？幾廿年朋友，唔會為咗呢啲嘢；不過當日睇到新聞條片個心都離一離，驚唔知點答傳媒朋友，返到屋企發咗幾晚噩夢，仲紮醒。」
阿倫續說：「但其實諗通咗就好簡單，都係幾樣嘢，無論職業、商業、業餘都好，全球有咁多華人，個個都識我哋，嗰餅咁大，點搞都好，只不過依家覺得佢同我哋嘅風格有些少唔同，因為佢比較肉緊啲，我哋比較嬉戲啲，大家睇法唔同；全球咁大，佢想點踢同點睇都得，相信有一日，佢迷途會返嚟，但佢未必迷途，可能佢方向啱都未定，我都希望佢做到自己鍾意嘅，其實我哋私底下仲有見面呀，過年都有講恭喜發財。」
