相隔25年，謝霆鋒宣布今年四月將於啟德主場館舉行兩場《Evolution Nic Live謝霆鋒進化演唱會》，更是亞洲首位登上場館開騷的歌手。開騷消息一出，全城即現撲飛熱，上月的信用卡優先訂購，門票隨即被秒殺，一票難求。
由於全城瘋搶，近日疑似「黃牛」於網上放飛，門票被炒至十七萬多一張，認真誇張！雖然霆鋒開騷，但就連阿媽狄波拉都大呻冇飛，楊受成博士透露：「阿拉姑都嗌晒救命呀！」問到英皇集團主席楊受成博士現在是否唔夠膽聽電話？驚人打去求飛，楊博士直言：「聽（電話）！點會唔聽！我話你哋登記先，到時如果有，我就俾你！」再問到會否加場？楊博士發揮幽默本色，「你知佢好有性格㗎啦，冇人可以叫到佢㗎，佢依家諗緊！」
對門票被炒高至六位數字，英皇娛樂集團營運總裁霍汶希（Mani）日前跟楊博士、久未露面的四哥謝賢、霆鋒及拉姑團拜，Mani勸大家要理性購票，「大家咁支持霆鋒當然開心，但希望大家理性啲，唔好咁樣炒貴啲飛，同埋唔好幫襯黃牛！」大家收到未？