一共十五集的綜藝節目《試真D》，今晚（1日）播出最後一集，因小學雞行徑常被江美儀寸爆的吳業坤，來到最後一集繼續成箭靶，事緣二人與朱敏瀚在品評有卵魷魚時，坤哥突然問店主魷魚是男的還是女的，結果令美儀氣至反晒白眼，連環狙擊坤哥：「你究竟有冇讀書㗎喺香港」、「你除咗唱歌之外，仲識唔識字㗎」、「真係好失禮。」美儀席間提到記得坤哥愛吃魚腩時，又不忘窒對方：「我就記得佢啲嘢，佢永遠唔記得我哋啲嘢」、「我依家開始擔心你太太」，令坤哥完全沒還擊餘地；節目中還會大晒坤哥「超級小學雞」字體。
另為答謝《試真D》粉絲支持，美儀姐、朱仔、坤哥、周嘉洛及曾展望早前專誠合體齊齊回應網民各式各樣疑問。對於被問到拍攝期間是否「真的冇人認得時」，美儀姐笑言：「真係唔認得，因為首先我真係好醜樣，點解呢？因為佢哋冇燈嘅，唔會幫你打燈美顏，淨係靠部手機揸住入去㗎啫。」坤哥聞言即作死搭嗲：「即係有盞燈就靚㗎喇。」搞到美儀姐反晒白眼，嘉洛仔見狀即急忙幫忙打圓場：「你本身都好靚㗎喇。」朱仔更取笑坤哥：「你不斷搵位自殺嘅？」
談到有網民問到五人會否覺得節目有貶意，朱仔則正色回應：「冇，我哋有個宗旨，一間再好嘅餐廳都有佢唔好嘅地方，一間唔好嘅餐廳都會搵到啲好嘅地方，我哋盡量中間攞個平衡。」至於坤哥亦難得正經謂：「TVB真係難得有個咁創新、唔係淨係讚嘅節目。」
