從《傻小子》到《男人背後》，周柏豪明年便出道二十年，早入行早成名，方才踏入男人四十黃金階段，柏豪坦言現在是他最開心的時刻，「父母健康，太太和子女整整齊齊，做到自己想做嘅嘢，覺得自己份人生拼圖砌得好完整。」
這種完整感，柏豪形容是花朵綻放的一刻——Blooming。
今年，柏豪展開大型粉絲見面會巡演《The Blooming Chapter》，首站選址香港，這是他相隔七年，再於香港開騷，正好為他明年的二十周年熱身。
周柏豪說，這次見面會《The Blooming Chapter》源自去年巡迴見面會《Chapter 4》，那時他從「三字頭」變「四字頭」，人生另一個關鍵階段。
踏入新一年，柏豪想開啟新篇章，但又希望保留「Chapter」這個字，四十一歲的柏豪說︰「我好鍾意花，花最靚嘅時候就係Blooming，綻放嗰一下最靚，所以就叫《The Blooming Chapter》，去到四字頭，男人四十一枝花，雖然老土，但我自己好認同，依家係人生最開心階段，父母健康，太太和子女整整齊齊，做到自己想做嘅嘢，覺得自己份人生拼圖砌得好完整。」
希望見面會一路走落去
雖然名為見面會，但柏豪直言內容豐富得像演唱會，甚至更具挑戰，「好多朋友聽到會覺得，等你開演唱會先去睇，但其實呢個同演唱會基本上冇分別，對於我嚟講，見面會仲難做過演唱會，演唱會只要跳好舞、唱好歌，企正盞燈下面，以音樂行先，但見面會係喺演唱會架構上，加好多互動元素，show前有應援、遊戲，完show都有好多嘢發生，唔係睇完返屋企聽歌就算，係一個嘉年華，要真真正正同觀眾互動，每位入場朋友都參與到。」
柏豪強調，這次見面會以音樂為主，但也會加入一些綜藝元素，「我會唱接近二十首歌，有大家喜歡嘅歌、有自己想唱嘅歌，甚至有現場點歌，香港站就可以做到呢樣嘢，要好好利用玩多啲！」這陣子，柏豪已錄了不少新歌，只是等待時機讓大家聽到，「錄咗好多首，起碼五首以上未派，有啲前幾年錄咗，一路儲起，但隔咗幾年，覺得編曲可以改進，或者自己表達可以更好。」本月派出的全新廣東歌《純粹想哭》，將會在見面會中首次現場演唱。
今次見面會在啓德體藝館舉行，問柏豪是否為明年二十周年熱身？他笑言：「希望係，下年入行二十周年了，不過今日唔知聽日事，但希望呢個見面會一路走落去，因為主要目的係將個show帶去遠啲地方，甚至未去過嘅城市、國家，用見面會形式同更多人交流，認識周柏豪的音樂。」
過去幾年，柏豪把事業重心放在內地發展，拍過不少人氣綜藝，獲封「大灣區男神」，更被爆在深圳一場高檔婚宴中，僅演唱《我的宣言》和《最好不過》兩首歌，出場費高達七十萬人民幣（約七十四萬港元），網民紛紛熱議其驚人吸金力。柏豪解釋︰「咁都唔係日日都有，呢啲一年都未必有一次，開心有人邀請，但唔係主要工作，都唔係個個搵我都會去，唔係睇報酬吸唔吸引，首先要睇同嗰個人有咩關聯到，無端端一個陌生人搵我有啲奇怪，要睇形式、主人家、賓客！多數太太係fans，或者一對新人都喜歡我嘅歌，對佢哋有意義，能夠為佢哋重要日子留下美好畫面，所有賓客都開心，咁OK，報酬唔係最重要，我去到都要覺得開心嘅，如果去到大家都唔理我，好怪囉！」
柏豪繼說︰「喺內地拍咗好多音樂節目和綜藝，得到很多經驗，令到自己喺舞台上面紮實咗好多，依家潮流興見面會，韓國、內地都做緊好多，我都想追趕一下，唔好只用一種模式見大家，可以有另外一個形式去見多啲唔同嘅人。」柏豪亦感慨時代變化很快，「我生於呢個年代好特別，由完全analog進入數碼，依家由數碼進入AI，橫跨幾個年代，我唔覺得舊年代最好，因為每個年代都有好處，depends on識唔識投入和享受，有沒有好好利用嗰個年代嘅美好，我依家仍然學習當中，一路希望試多啲新嘢。」
他笑言自己是全家人的「Database」，數碼時代亦把他優化了美好的回憶，「我好鍾意儲存回憶，曾經壞咗hard disk，失去好多相，包括婆婆生活照……由嗰時開始，我就好好管理photo album和video，分類、分時間，依家有face detection，所有人搵相都搵我，因為我database好強，經常有『當年今日』，我就會刻share俾屋企人睇。」
成家立室之後，柏豪最大改變是時間管理，「以前可以花好多時間喺啲無聊嘢，依家完全冇時間做唔重要嘅嘢，要好精簡，臨瞓前plan定明日做乜，因為牽涉小朋友schedule，放學後中間兩個鐘頭，之後去課外活動，嗰兩個鐘頭要做乜？下個禮拜要做show，要留時間練琴、練結他、跑步、運動，自己要plan得好好。」做了爸爸，柏豪仍然每日堅持六點半起身，「無論前一日幾夜瞓，六點半一定要起身，同佢哋洗面、食早餐、著校服、送上校車。我噚晚同佢哋講，聽日要開工未必送到返學，但最後都自然起身，可能因為新年開學，想陪下佢哋影相，好唔捨得。」
談到一對子女，柏豪滿眼溫柔，「個女六歲，開始變大人，有時返學望住佢背影，嘩！高過滑板車咁多，已經校到最高格，原來已經唔係小朋友，冇BB仔，好唔捨得，女仔更唔捨得，因為囝囝大個可以一齊做gym、揸電單車，男人去到咁嘅年紀都係細路，可以癲，但女仔會嫌爸爸囉嗦，生命出現另一個男人，我要調整心態，投入爸爸角色外，亦要知道某段時間要抽離，俾空間和自由，太太成日話『得㗎啦，放鬆啲！』」
封面攝影協力：Ernest Cheng
花絮攝影：鍾漢平
形象︰Winnie Hu
化妝：Jenny Tziong
髮型：Pakman Chau
服飾：COS、Sandro、Shiatzy Chen、YMDH
