許鞍華昨日（25日）攜同關錦鵬、劉天蘭、楊凡、李樂詩出席香港流行文化節2026「奇幻電影之旅」——《撞到正》4K數碼修復版全球首映禮，久未露面的蕭芳芳更獲主創團隊邀請出席，令觀眾喜出望外。
當蕭芳芳出場時，觀眾報以掌聲與歡呼聲，劉天蘭則體貼地提醒觀眾不要拍掌，因為聲浪會令她頭暈兩禮拜，「我們用燈光與愛心來歡迎她。」蕭芳芳一邊向老朋友送上飛吻，一邊感動哽咽：「好多謝你哋鼓掌。我今日覺得好幸福、很幸福！因為‥‥‥我講唔出‥‥‥」
作為《撞到正》的監製，蕭芳芳慶幸作品在楊凡促成下得以修復重映，「46年前我哋拍嘅呢部戲，今日有機會喺呢度做首映禮，因為楊凡導演先至有呢個機會，亦都要多謝電影資料館，我好感激佢哋修復咗呢部戲，我諗呢部戲修復咗之後會好好睇。要多謝導演阿Ann，多謝Tina，多謝李樂詩，多謝阿關，多謝蓮姐幫我哋化妝，係度套戲好似得咗獎咁，最後一句，我祝大家身體健康，日日都快樂，唔阻大家睇戲。」
許鞍華難得與曾經的戰友同台，臉上掛着笑容與觀眾分享：「今時今日再睇呢部戲都唔會覺得悶，因為佢嘅節奏好快，同埋佢係一部驚悚喜劇，所以你睇嘅時候有時會驚驚哋，有時又覺得好好笑。呢套戲嘅構思喺當時係相當前衛，當時唔興笑片溝恐怖片，但而家嘅電影又好興溝埋唔同類型。呢部戲其實係芳芳諗出嚟，佢初頭同我講拍一齣喺戲班嘅鬼片，我以為要拍好驚嘅內容，但芳芳話唔好拍到咁驚，如果唔係家庭觀眾就唔啱睇。嗰陣時我哋做資料搜集比較快，一問夠料就拍，由資料搜集到寫劇本唔超過6個月，嗰陣都唔興手機錄低啲料，所有資料全部記喺個腦度。關錦鵬做呢部戲嘅副導，我哋兩個人諗嘢嘅方法都好近，所以我一諗一講佢就即刻知我想要啲乜嘢，但係如果嗰個人同你嘅諗法唔同，咁你要解釋畀佢聽佢先識做，所以我覺得我非常之幸運。」
在戲中飾演紅衣女鬼、同時兼任執行製片的劉天蘭回憶道：「46年前認識咗台上各位，我諗台下好多人仲未出生呢！當年我仲係個小妹，跟住劇組拍咗8個月，感覺夢想成真，開啟咗我對電影更濃厚嘅興趣！」
關錦鵬很開心可以跟着許鞍華，當她的副導演，「因為喺佢身上我學到太多嘢，我印象中許鞍華導演好少喺拍攝現場鬧人，作為導演佢會好知道喺鏡頭裏面嘅需要，所以佢會提佢嘅副導演點樣擺背景後面嘅臨時演員，又或者係連戲嘅導具。我第一次同佢合作，從佢嘅教導我更加知道副導演要做啲咩嘢，所以之後我變成一個幾搶手嘅副導演。嗰陣時芳芳姐同B哥哥已經係非常紅嘅演員，我細個住嘅地方隔離就係戲院，我好鍾意睇陳寶珠同蕭芳芳嘅《彩色青春》同《紫色風雨夜》，所以第一次幫許鞍華做副導演就可以同芳芳姐合作，再加上B哥哥亦都係一個好紅嘅歌手，待人亦都好友善，所以喺現場我當然係好盡責地做好副導演嘅工作，但係我亦好似一個影迷咁係鏡頭後面睇住佢哋表演。」
李樂詩回憶小時候經常跟父母到睇大戲，對戲棚很熟悉，所以聽說電影團隊要拍攝跟戲班有關的電影，並邀請她擔任美指時，二話不說便答應，「芳芳姐嘅造型唔需要特別諗，因為佢係可以放喺任何角色度，我對佢嘅化妝，服裝同埋動作都好了解，所以冇乜困難。」
