蔡潔最近忙於拍攝《風華背後》，能夠跟一班崇拜之演員合作，令她好開心:「好似蔡少芬、譚耀文咁，每次開工都有心跳感覺，擔心唔知佢地覺得我做唔做到，但呢啲前輩真係好友善，所以大家合作得好開心。」
雖然忙，但蔡潔日前卻分身到澳門做瑜伽導師，教各人呼吸方法、熱身及示範拜日式，表現得好專業，完成後不少學員都爭取同蔡潔老師合照，原來今次是蔡潔考取瑜伽導師牌後首次公開擔任導師授課，為了不令學員失望，更早早抽空練習及準備課堂所需。不少人對蔡潔教瑜伽感到十分驚訝，其中她一把溫柔悅耳聲音，令人覺得好舒壓。
蔡潔多謝澳門政府邀請，「亦都多謝我個好朋友Candy幫手一齊授課，開始前有啲緊張，但一按住張瑜伽墊就唔記得咗緊張，好沉浸喺過程當中，今次無當做一個純教學之體驗，只係想分享，同學們都好投入好享受去成個練習當中。」
原來蔡潔從少就跟媽咪學習瑜伽，今次第一次公開授課，蔡潔自覺表現尚可接受，最搞笑是有些網友話導師好似蔡潔，她認為今次能讓大家見到演戲以外不同的一面，實在是好機會，但暫時蔡潔都不會放下演藝工作去開班授課，因為她好忙碌，拍劇之外又出版漫畫書，她更想發展多些漫畫周邊的東西，年底更有漫畫主角crossover的展覽，所以教瑜伽就隨緣。
