入行15年的蔣家旻終於憑劇集《美麗戰場》反骨琪一角，成功奪得「最佳女配角」，她說：「多謝珍姐，一路睇住我成長，俾機會我、俾意見我，對我有信心；多謝導演葉念琛對我嘅信任，俾我演反骨琪呢個角色，其實我哋相隔十年再合作，佢對我無限信任及令我超越自己！可能好多人覺得我演藝條路行得慢，但我訓練班出身，一路看見好多師兄師姊一步一步，令我覺得無角色的經驗，成就唔到今日的自己，所以我會繼續做好自己。呢幾日心情好緊張，胃口愈來愈細，仲試過有晚失眠，原本平常心，但收到好多訊息留言，加上新聞又話我係大熱，好有壓力，攞獎之後我好似幫咗所有人實現願望，因為大家都想我獲獎，原本以為自己台上會喊，追夢都十六年，但我竟然無喊，希望之後有機會做女主角，係我夢想。」
