由周嘉洛、陳瀅、王灝兒（JW）、朱敏瀚、張頴康主演的《痞子殿下》，即將進入結局周，劇情講到成為鎮首的紀威（周嘉洛飾）帶隊上山剿滅山賊，紀威出發前獲贈「天蠶寶衣」，卻虛有其名只有保暖功能，純屬笑料。不過其實該件「天蠶寶衣」大有來頭，資深藝人于洋於1983年播出的短劇《七彩如來神掌》中就穿過類似戲服。
據知劇組特意為嘉洛找來近似戲服，藉此向經典作品《如來神掌》系列及粵語武俠長片致敬。對於跟前輩于洋「撞衫」，嘉洛受訪時自言未夠班：「于洋大哥型好多，同埋覺得幾唔好意思，因為有場戲唔小心整爛咗件衫，好彩後尾都補得番。」
至於躍升副鎮首的裘千刀（朱敏瀚飾）則因「突發事件」性情大變，事緣千刀化身「一劍大俠」撇甩大隊獨自上山再剿山賊，但一覺醒來後忘記所發生一切，後被霍青山（曹永廉飾）診斷患上「離魂分裂症」，因而爆出雙重人格，變得成熟、聰明兼有領導才能。朱仔的「一劍大俠」造型非常帥氣，戲服與劇中漫畫「一劍大俠」一致，相當有心思。朱仔透露很滿意該造型，感覺有點似蝙蝠俠，連陳瀅對被迷倒，他說：「佢見到我呢個造型嘅眼神好似見到偶像咁，俾咗好多信心我。」
朱仔更笑指套戲服是全劇「第二最焗」，說道：「除咗猩猩衫，呢套應該係全套劇第二熱嗰件衫，好彩拍攝時都習慣咗流汗嘅狀態，好記得有一日拍完俾番套衫服裝部，佢哋好驚訝點解件衫冇乜汗，主要係因為啲汗流到冇得再流，佢哋好擔心我中暑，但回想番都係覺得好玩。」
