Archie冼靖峰、DEZ余宗遙、Hugo黃奕斌、Hugo黃星綽、Sean文佐匡組成男團SURFIVE，5人早在節目《亞洲超星團》就認識，甚有默契，他們推出第一首主打歌《POPSTAR》，MV邀請到IdG Bubbles偶像女生成員Anesa 莊嘉詠擔任女主角。
Archie表示參與男團與自己個人演出感覺大不同，要放低自己很多想法配合整個團體的節奏與風格，提到要跳舞，他笑說：「跳舞直頭係我盲點㖭呀！惟有練多啲去補飛，不過，我相信自己一直以嚟嘅訓練，相信自己有進步，加上今次齊人排舞時間唔多，都係得兩次，比着以前嘅我一定唔會咁短時間練好。」被問到與女主角Anesa的合作，他說：「我數過原來我係SURFIVE入面最老（27歲）嗰個囉！我都大佢幾年㗎，不過應該都冇咩代溝嘅。」
黃星綽與Anesa有個鏡頭要近距離對望，在場成員睇到「嘩嘩聲」，他扮傻說：「我都唔知咩事喎，咩嘩嘩聲呀？借位嚟啫，我哋都有隔5、6隻手指距離㗎！」黃星綽直言女方令他有心跳加速的感覺，但當Anesa被問到感覺如何時，她爆笑說：「個感覺好似挨落阿Chur（IdG Bubbles成員）度咁，冇心跳加速呀，保持專業㗎嘛！」原來黃星綽是阿Chur弟弟，Anesa覺得兩姊弟好似樣，「特別係對眼，拍緊嘅時候我當佢係短頭髮版嘅阿Chur。」Anesa被問到如何可以極速跟5位男生一拍即合，她直言：「我覺得最主要係唔怕醜，因為我平時喺group入面都唔怕做啲奇怪嘢，其他隊員有時都覺得我好跳掣，所以都係做返平時嘅自己。」
更多圖輯：
