香港選特首已進入埋牙階段，馬入了閘，跟住就係各顯神通，積極拉票催谷。鬍鬚、林鄭各擅勝場，林鄭形象打得是也。鬍鬚佬表現親和睇嚟有傾有講，面對公眾梗係可以溝通嗰個着數好多。下下硬橋硬馬，恃住打得，好多人會頂唔順。唉，玩政治，梗係要玩手段㗎啦，唔識用太極推手，招招實牙實齒，心口碎大石，唔止瓷器，缸瓦都俾你撼爛晒，睇吓振英哥你就知啦，咁玩法，你又唔開心，全人類更唔開心。
香港真係當黑，回歸以嚟，一個特首腳痛，一個特首俾人告貪污，一個俾全人類問候，再嚟呢個千祈唔好蹈前人覆轍。但係，說話講出嚟好容易，世界上有幾多個唔會做錯嘢嘅聖人呀？自古以來都有句說話，一人計短，二人計長，點解今次香港選特首唔選出雙特首嚟領導香港唧？馬會跑馬，都會跑出兩隻分秒不差嘅雙冠軍啦，兩個特首以長補短，好打得，好做得嗰個特首專門去做實務工作，一切開山劈石，排除萬難之重中之重嘅重任由佢孭起。如何面對公眾，如何响公眾前面鋪陳政府計劃，同公眾商量點樣改善當前環境，呢的惡鯁嘢由鬍鬚叔叔鯁晒，兩個人閂埋門拗頸又好，商量又好，隻揪又好，都以大事為重，一心一意為香港好，大家以長補短，香港一定會好。
咁玩法，阿爺會同意咩？唉，阿爺、阿爺接手以來真係未停止過頭痕呀，一劑接一劑，一鑊接一鑊，慘在又唔出得聲，最好你班友生生性性，唔好事事令佢頭痕，老爺要改制，話都冇咁易啦。