余迪偉、阿Bu（姚家豪）與鄒凱光（灘叔），三人從電台《一八七二遊花園》到YouTube《三叔公園》，默契與毒舌早已成為香港觀眾日常的安慰劑。
2024年《壞-ology》首次登陸麥花臣，今年10月「三叔」重返旺角麥花臣場館，帶來六場Talk Show《膠級大人》。先聽他們拆解「膠級大人」從何而來？如何用真實經歷派膠？以及為甚麼「要做個高級大人，首先要擁抱低能」？
阿Bu舉了一個生動的例子來界定所謂的「級別」，他說：「例如壞咗個燈泡，燈泡都唔識換，咁你梗係初級大人啦！但唔係喎，我可以即刻俾500蚊叫師傅嚟換，我冇學過點樣換燈泡，但我有500蚊俾師傅上嚟換，我係咪即刻變成高級大人？」迪偉補充道，面對事情的態度和解決方法，才是界定一個人是何種大人的關鍵。因此，他們構思出「膠級大人」這個概念，探討成年人面對事情時，是否可以用一種比較「膠」（滑稽、荒誕、輕鬆）的心態去處理。灘叔說︰「面對你經歷嘅事情點樣解決，先會界定你係一個乜嘢樣嘅大人。膠唔膠級，係你用一個乜嘢方法去解決件事。」三人認為在生活悲喜交集的當下，一點正能量，已足夠為苦澀生活加一點甜。
三人在鏡頭前火花四濺，私下對彼此的「大人級別」又有何評價？阿Bu毫不留情地將灘叔歸類為「初級大人」，直指他：「在工作以外就是初級大人，從來沒有高級過！」至於迪偉，阿Bu則笑言他在工作上是高級大人，但在生活上卻十分「低級」，阿Bu說：「因為佢扮高級，又話自己識飲酒，又話自己品酒，其實啱啱學識分紅白酒嗰種！」
迪偉對此笑着承認，並表示這正是他們相識十多年的氛圍，大家性格依然如故。談到彼此間最「膠」的真人真事？灘叔回憶起大約十年前的一段荒謬插曲：「我哋返電台，我揸車返去，佢（阿Bu）落車，我個轆壓到佢隻腳，而佢隻腳又冇事，依家仲可以去踢波，佢不停咁話『喂！我對鞋！』」面對車輪壓腳的危險瞬間，阿Bu在乎的竟然是自己的波鞋，這種反應讓灘叔覺得「膠到好離譜」。
2024年「三叔」首度以Talk Show《壞-ology》登陸麥花臣場館，回顧這兩年的轉變，灘叔坦言自己經驗豐富了許多，「上次係處子作，我係第一次做，所以好緊張，但自從嗰次之後，又做咗套舞台劇，今次再做，所以嚴格嚟講我係第三次做，心情係會唔同咗。」說到突破，阿Bu之前的演出大開金口唱歌，讓拍檔們大跌眼鏡，灘叔說：「當年佢初試啼聲，仲要好sweet咁唱俾老婆聽，效果竟然係好好，我哋喺後台已經拎好嘔吐袋，到頭來我哋仲係拍掌，真係流咗眼淚。」灘叔更笑言阿Bu是「因為做生意而被耽誤嘅歌手」。
今次的《膠級大人》，除了貫徹Talk Show的形式外，更會加入大量肢體動作，迪偉提到，節目會牽涉到被稱為「Slapsticks」的打鬧喜劇元素，就像當年差利卓別靈（Charlie Chaplin）的默劇一樣，充滿誇張的肢體語言。迪偉坦言，對於不常在舞台表演的他們來說是一大挑戰，但因為不是平時常做的事，反而覺得非常好玩，而阿Bu預告可能會有抽獎環節（雖然強調今次沒有變魔術），極少量的VIP門票更可入後台，與三叔「膠流」和合照，誓要將最豐富的娛樂元素帶給觀眾。
在網路時代，許多創作者都急於討好年輕一代，但《三叔公園》卻選擇堅守自己的步調。據阿Bu查看的YouTube數據，他們最多觀眾的年齡層是25至34歲，其次是34至44歲，未滿25歲的觀眾排在第三。問到會否特意為Gen Z（Z世代）設計內容時？灘叔直言：「冇特別想去吸引佢哋，因為如果特別去向佢哋獻媚，佢哋仲會憎我哋，仲會唔理睬我哋㗎！」迪偉也深感認同，他認為Gen Z的喜好難以捉摸，與其刻意設計笑話去迎合，不如自然流露，「你入嚟有共鳴嘅位就會笑。」
「三叔」堅信只要內容有趣、真實，觀眾自然會被吸引，因此他們盡量避開刻意討好，專注於做自己（Generation X）的事情，他們說︰「我哋希望觀眾笑完之後，會有啲嘢反思下自己嘅生活，反思下自己生命，係帶啲嘢走嘅。」
迪偉感慨道，以前八、九十年代的笑片，可以讓人笑到碌地，他希望三人的化學反應能讓觀眾會心微笑並產生共鳴，因為放在台上的都是他們的真人真事，他強調：「係你笑完之後，會有啲嘢反思下自己嘅生活，反思下自己嘅生命，會有啲嘢帶走嘅。」阿Bu則特別珍惜與觀眾「人肉接觸」的機會，在習慣了透過手機熒幕觀看的現代，能親眼看到表演者，能即時聽到觀眾的掌聲和反應，是一件非常享受的事。