唔好意思，新年流流就講啲唔啱聽嘅嘢。有啲人聽到無聊口痕友封你一句好打得，就自覺真係好打得，蜀中無人，執到件就攞去做先鋒。聽到人講好打得，就應該及時醒覺啦，睇睇啲舊經典，好打得嗰啲，有幾多個係好收場㗎？呂布奮戰力疲，休息一下就俾手下綁起奉獻曹操。張飛又係飲醉酒俾手下殺咗。岳飛精忠報國非常好打，皇帝同奸臣夾埋害死佢。近嘅，林彪、彭德懷所向無敵，都係死得好慘。有人話你好打得，真係唔恭喜，如果我聽到呢句說話，一定走直辮尾，受唔起呀。有前冇後，打死罷就，唔該搵第二位。
睇古典小說《三國誌》，你就會發現，二千幾年前人類智慧有幾發達，怪不得偉大主席毛澤東，將歷代帝皇將相視之如無物，唯是一個曹操才有點佩服，奸得起，贏得起，輸得起，只有佢計算人，不被別人計算，更加不做蠢蛋爛頭蟀。有人說：曹操赤壁大敗，要不是關雲長在華容道放了他，他早就死了。說的人沒有想清楚，是孔明不要曹操死，才安排關羽負責放人，要是曹操死了，魏國就不存在，劉備就立即滅亡，強大的孫權早就虎視眈眈了。唉，玩政治，唔係有前冇後，打死罷就的考第一高材生就搞得掂咁簡單嘅。
今時今日香港環境，誰是真命天子，到而家仲未有人知，香港咁多堪輿家、紫微斗數、風水命理專家，應該算一算，睇睇未來幾年，香港地運會如何，嚟緊嘅三個月，食瓜定係食菜㗎嘞。最驚有啲人，應咗一句口頭禪，一朝得志，語無倫次，還望上天，保佑香港。