郭羡妮和歐瑞偉今日（12日）出席《第16屆「戒煙大贏家」無煙社區計劃頒獎禮》，兩人分享舒壓方法，Sonija表示減壓方法就係用478呼吸法及彈鋼琴，早前更與伍仲衡四手聯彈，獲網民大讚，「從來未試過四手聯彈表演，佢又好好人問我想彈咩歌，我近排好鍾意《用背脊唱情歌》，佢就即刻寫譜俾我，仲寫埋《天命最高》，一口氣寫咗兩首歌譜俾我，我有段日子無碰過琴，屋企個琴係15歲時爸爸送俾我，彈到八級後無再學，之後成座琴跟我移民去加拿大再跟返香港，返香港之後又不停搬屋，真係好耐無彈過，只係上次剛好港台做訪問，我見到有部鋼琴喺現場就彈，經理人拍低擺上網，估唔到咁多網民讚，令我有返彈鋼琴嘅興趣，如果大家想睇，我又有心情就彈囉。」
Sonija認為女仔不應該吸煙，她平時相當注重飲食，「女仔一定唔可以食煙，平時飲食方面都要戒口，有時都要忍口，唔好食太多，但又唔好俾自己感到好慘，只係食少啲，食五成飽就可以，開工前會減肥，但開工後就唔怕，唔使減肥，因為要有體力去工作，而且之前拍《尋秦記》電影時會有廚師煮住家飯，所以我好少出去食，因為我好鍾意食住家飯，我屋企平時係工人煮，有心機就自己煮，大時大節就會親自下廚。」
歐瑞偉坦言曾經是煙民，「以前曾經係，有段時間等開工時會吸煙，但之後覺得唔需要，最後話唔食就唔食，無咩煙癮。」近日歐瑞偉分享了拍攝《愛．回家之開心速遞》花絮，他要將6位女星逐一由房間抱出走廊，他完全無喘氣，被網民大讚好腰力，寶刀未老外，又被問到哪一位女星最重，「抱咗6個女仔，NG兩次，無咩難度，（邊個最重？）最重係我自己，唔好講最重，不如講最輕，就係邵初，我平時都有鍛鍊身體，因為拍劇需要好多唔同範疇，一定要保持好身型，睇落瀟灑好啲。」
更多現場圖輯：
