林智樂（Felix）推出新歌《魔法情侶工作室》，他首次嘗試輕快浪漫曲風，MV邀請到《聲秀》師妹甄敏芳（Jenny）擔任女主角，飾演一對校園情侶，Felix形容是「可一不可再」，他笑言：「我演藝生涯可能係得一次會有咁close嘅鏡頭。」關於新歌為何一改風格，Felix指自己是「老靈魂」，他說：「之前有歌迷留言話，不如唱一啲貼近你年紀嘅歌啦，青春啲後生啲嘛。之後喺監製舒文send嚟嘅demo入面，我一聽到呢首就揀咗，因為好入腦，我聽一次就已經記得點唱。」他又分享錄音時，舒文花了整整一個session去雕琢如何唱好verse部份，拿走唱腔中他認為虢礫緙嘞的聲音。
在MV中，Felix與Jenny有近距離的甜蜜鏡頭，畫面充滿粉紅泡泡，Felix透露拍攝前有好好溝通，「有問清楚對方o唔ok，如果唔ok可以改，佢覺得唔舒服或者你邊一邊面靚都可以改，最緊要係令對方感覺得舒服，安心就可以，咁就唔會尷尬。」
Jenny首次拍攝MV，她坦言接到任務時既興奮又緊張，「盡量早啲瞓，用心護膚，希望以最好狀態去拍攝。事前溫習時見故事大綱有親密接觸鏡頭，我好驚自己會忍唔住笑，又或者會怯場退縮。所以有搵屋企人陪我練習，預先體驗同另一個人保持極近距離嘅感覺。」
Jenny大讚師兄貼心又幽默：「佢好直率又搞笑，而且察覺到我會尷尬，拍親密鏡頭前會一直安慰我『唔使擔心』，叫我放鬆啲，令我非常安心。休息嘅時候佢亦都會同我傾計，互相多了解，令到正式拍攝嘅畫面更加自然。」她又說：「Roll 機時可以迅速投入角色，但真係好近嘅時候確實會緊張、心跳加速，甚至唔敢呼吸！拍完之後先發覺成個人好熱、出晒汗面都紅埋！」
