她是「舞小姐」白姑娘，但年紀不是一朵花。臉上塗着厚粉，身上桃紅旗袍，粉紅毛衣，配珍珠項鏈，一頭大鬈髮，俗艷的裝扮放到她身上，沒擦香水也散發着濃烈香水味。
只見她走到兩個正在玩紙牌的小孩身邊，對其中一個說：「阿煥呀，阿媽返工呀，今晚早啲上牀呀！」小孩聽了回她：「我要聽埋《夜半奇譚》先至瞓覺。」她也沒有不准，只說：「唔好冚過頭，焗到成身汗，知唔知？」
交代了兒子，掀開同屋板間房的布簾，大聲對內裏的人招呼：「黃師奶，未瞓呀？」黃師奶：「咁夜至返工？」白：「係呀，呢排茶舞淡到死，我都無返茶舞啦。呀，係呀，黃師奶，嗱，夜啲有糖水車經過呢，你鍾意吔咩嘢就買嚟吔啦，順便同我買多碗俾個衰仔吔呀。」從手袋掏出一張銀紙塞到黃師奶手裏。「我幫你買俾佢呀，佢哋唔使囉。」黃師奶本來半身坐起躺在碌架牀上，這時候轉身雙腳下了地。白姑娘緊張地提高了聲線：「唔得嘅，大人唔吔啫，細佬哥要吔㗎嘛，如果無糖水，買碗柴魚花生粥俾佢就得㗎喇。」「哦。」黃師奶收下鈔票，感覺是時機了，便說：「今日未出呢期糧呀，聽日怕有㗎喇……」，原來舞小姐是房東：「得喇得喇……」。
黃師奶還沒放得下心頭大石，已咳嗽起來。見狀，白姑娘彎了腰對她說：「黃師奶呀，你呢排成日cam cam聲，捱過籠呀喱，要因住至好呀……」一轉身，對房外喊：「阿煥呀！睇吓白牌佬架車响樓下未！」黃師奶的答案又教白姑娘轉回身來，「怕係索埋索埋啲抽紗啦，好多人都係咁話㗎啦，索埋索埋入咗去個肺嗰度都未定啦，抖起氣上嚟牽住唔上唔落咁樣。」白姑娘見她咳聲又起，伸手去拍黃師奶的背，「頂唔順嘅，叫阿影出去，你自己响屋企抖吓囉。」說罷，對正在釘珠片的孖辮少女說：「阿影呀，你要顧住個老母得㗎。」少女不知如何應對，阿煥已從外面叫進來：「白牌佬响下面呀！」白姑娘聞聲要走：「我返工啦，唔該晒你哋吓！」走出房間，見阿煥，摸摸他的頭：「又掛住玩，你睇吓你，咁快就一頭汗，阿媽去啦，早啲上牀瞓呀！」
她才走，阿影出，要與阿煥玩的弟弟回房睡覺，弟弟說也要聽完《夜半奇譚》，影對弟說：「人哋唔使返學你都唔使咩？」阿煥見玩伴被阿影帶走，對影說：「咁衰㗎！」影聽了反問：「講邊個呀你，無用㗎你，你阿媽啲錢好辛苦賺㗎，你可以留班唔返學咋，我細佬無你咁本事呀！」
白姑娘是佩雲，黃師奶是李香琴，阿影是鄭裕玲。三個五十年代香港低下層女性的對話，精采不在內容，在傳神的語氣。