香港首個萬聖節音樂嘉年華《Spooky Halloween》昨日（24日）於灣仔海濱活動空間舉行，張敬軒擔任壓軸表演嘉賓，連唱《Deadline》、《羅賓》、《酷愛》、《青春告別式》、《笑忘書》等多首經典作品，現場氣氛熾熱。他笑言戶外演出氣氛極佳，但因音響關係只給自己80分。
演出後，張敬軒接受訪問，並回應近日網絡熱議的「軒公」事件。他表示早前在深夜直播中提到「被叫軒公叫到悶」，引起外界誤會，主持方健儀更為此在網上致歉。張敬軒澄清事件純屬誤會，強調：「一場誤會！大家鍾意點叫就點叫啦！」
他解釋指，事件起因是自己在直播時表達不夠清晰，他自己都有問題，說得不清不楚、沒頭沒尾，「應該係新聞出咗之後大家誤會咗，連我阿媽都打電話畀我問咩事。」他亦向方健儀表達歉意：「我都有同Akina講，其實佢唔使道歉，我自己都有疏忽、太放鬆咗嘅地方。」
至於是否介意被稱為「軒公」，張敬軒解釋：「我唔係唔鍾意個名，但好多大我幾十年嘅長輩都會叫我軒公，我個人比較傳統，覺得輩份上唔係好受得起，所以嗌返軒仔啦！」他更笑言：「我老闆楊受成博士都係咁叫，每次見面、大庭廣眾都係叫軒公軒公咁樣，我真係受唔起呀！」他亦提到母親對他的稱呼相當貼地：「我阿媽叫我……都係『喂！』『死仔！』咁樣囉！」
談到事件的後續反思，張敬軒表示：「有啲批評好好，係好好嘅反省機會。唔好以為深夜開直播唔會上新聞，依家係新常態。」他強調今次風波對自己是一個提醒，往後會更謹慎表達。另外，張敬軒透露「軒公敲碗」頻道名稱並不會更改，笑言名字源自英皇年輕同事的惡搞靈感：「七十年代有套戲叫《關公大戰外星人》，佢哋就諗咗《軒公大戰透明人》。」
