張敬軒紅館演唱會來到第五場，一直揚言每晚都當尾場做的軒仔，每晚都因為觀眾完場後不肯離場而二度、三度安歌，昨晚（14日）更破紀錄四度返上舞台，令歌迷開心不已，又請來Serrini任嘉賓，兩人合唱《披星戴月》，之後Serrini再獨唱《旋轉with me》，全場立即起哄，氣氛熱烈。
軒仔表示這個二十周年演唱會，原本是送給自己四十歲的生日禮物，豈料由四十歲開到四十一歲，因此很感激大家給他機會，並笑說：「咁都做到part 2！」他在疫情中開演唱會，心理一定有壓力，自言在這段期間學會要好好活着，好好把握自己在世上的時間，做自己喜歡的音樂，「我要將上帝俾我嘅使命好好去履行，我喺樂壇不是純粹要呃like，喺IG扮鬼扮馬氹大家開心。我應該利用自己手頭上得到嘅再分享俾人，呢個先係我價值！」他續說：「自己做新人時，有段時間叫『嘉賓王』，做過好多前輩演唱會嘉賓，係前輩俾個舞台我，令我得到好多人認識。而家我都要俾番機會新人。今晚嘉賓都係一位新人，我哋冇乜交集，但識咗好長時間，呢個咁有才華嘅女人，咁叻、咁有趣，令我流曬口水，希望將來音樂上有合作！」接着便介紹Serrini出場，全場觀眾即歡呼四起，掌聲不停。
Serrini上到舞台，軒仔便對她的「戰衣」感到好奇，既像聖誕樹，又似波波裙，「我以為係小鳳姐。」Serrini回應道：「我似雀仔係咪？其實呢件係絲絨被。」隨後她表示有禮物送俾軒仔，「我見人人都有禮物，不過我唔會送果醬嗰啲‥‥‥呢個係一個鑽石切割的心形葉葉。」軒仔接過盆栽，笑言：「我知呀，呢種叫多肉植物嘛！」Serrini回答：「咪係我囉。多肉樹樹‥‥‥你唔使淋咁多水，dry dry哋就得。」軒仔即抵死地說，「dry dry哋，咪似我？」Serrini開啟爛gag模式：「因為你頭先升高咗個lady（諧音：single lady）」。
Serrini於台上看似十分緊張：「真係唔知點解見到軒仔就緊張到不得了，想講嘅說話都唔記得咗。」她透露跟軒仔是由網友變朋友，「佢好早follow我，跟住咪網友囉。佢對朋友好好，而且佢聽得明我啲無聊笑話。所以我地好多嘢傾。我嘅第一次‥‥‥紅館做嘉賓就俾咗佢，哈哈。」
