譚輝智為個唱舉行記者會，太太及子女撐場。
譚輝智將於今個月26日於九展舉行首個演唱會，今日（15 日）舉行發布會吸引過百粉絲到場支持，當然他的父母，太太及一對仔女都現身撐場，他表示當收到開騷消息一刻嚇到面青青，「心情當然好興奮，記得當刻我人在泰國最後一日收到電話，我仲以為係打錯電話搵錯人，我仲反問對方，我開演唱會？當時我同太太食緊飯，太太都望住我，覺得我塊面青晒，因為我真係唔敢相信，自己都覺得太快喇，唔知自己得唔得，但因為剛參加完比賽又完成《中年好聲音2》演唱會，都怕應付唔到，但機會到來，唔可以錯過，至少參加完比賽令我會大膽去嘗試。」
輝智透露個唱會有跳舞環節
今次演唱會海報更Ｐ圖變一身肌肉，問他會否擔心一除衫就觸犯商品說明條例？他即笑言，「我影海報時係有，不過𠵱家無晒啫！不過𠵱家都努力練緊，不過集中喺一嚿。」至於當晚會否除衫騷肌，「好多人都問會唔會擁有呢個身材，當然到時先知，但近排我都努力做運動，游水及跑步，除咗減壓又可以練氣，依家練到集中一嚿，但我又覺得張海報嘅身形太大隻，睇完都問自己有冇可能？不過演唱會就一定會有跳舞環節。」由於爸爸同樣愛唱歌，會否邀請做嘉賓？他表示都要問對方意願，暫時未知。
更多現場圖輯：
