夏韶聲 DANNY SUMMER 、JOEY TANG 鄧建明 《Arrival ♾ Departure》演唱會舉行在即，二人不時秘密練兵，以刺激聽覺及視覺藝術嘅「概念音樂會」，講述宇宙降臨及離開家園嘅故事。為保持個唱神秘感，由海佈拍攝、練歌、製作會議時，他們都謝絕非「核心成員」參加。夏韶聲笑指多年未舉行演唱會，一直深居簡出，鮮有以「靚佬」造型示人：「幾耐未試過Set呢啲咁勁嘅髮型，真係啲佬味出晒嚟！其實呢個騷係『概念音樂會』，視覺、聽覺都要有不一樣嘅感覺，我地要集中精神做準備，所以唔俾宣傳團隊參加綵排，怕佢地爆晒出嚟冇神秘感。」
而另一主角鄧建明就話準備得「七七八八」，與「阿公」同台感興奮：「佢同我嘅關係唔需要再多講，我可以同呢位前輩合作，真係興奮到瞓唔著！Danny Summer不時會有新嘅Idea，每次開會都會覺得好正，咁要辛苦導演、監製，不時幫我地改Rundown、改舞台，所以我話準備得『七七八八』係因為隨時可以上台唱，但其實Rundown可能次次開會都變緊。」雖然Danny Summer口密拒透露個唱細節，不過Joey就自爆舞台「秘密」：「今次演唱會舞台係好特別，觀眾抬頭都望到星空嘅感覺，Star Hall 有史以來都未做過咁嘅效果，現場所有觀眾都係超近距離接觸個舞台，仲會有好特別嘅lighting 同laser，配合翻『Arrival Departure』 超現實主題。」
Joey早前與太極隊友雷有輝第一次街頭Busking，二人作為「Busking界」初哥，感到無形的壓力：「其實Busking就當係練歌，順便比人知道呢個騷當宣傳囉！但係Busking真係有壓力，音響、結他都要自己Setup，後來大家知道係我同亞Pat唱緊，慢慢圍埋嚟睇，呢啲現場感仲正過紅館。」