夏韶聲（Danny Summer）的原創漫畫《西遊Go West》已先後推出兩集，去年11月曾舉行《夏韶聲的漫畫世界及簽名會》，當時Danny已表示正忙於投入第3集的創作工作，相隔不足一年，Danny宣布好消息，昨日（13日）漫畫正式推出，並在書店舉行新書簽名會。Danny坦承由於去年工作太忙，推遲了第3集推出時間，「原本我畫得快啲，舊年或者今年年頭出到第3集，但舊年太忙，因為我唔係用電腦畫，我係一筆一筆咁畫，所以要時間，畫1集起碼1年有多。」他堅持棄電腦用手繪形式完成創作，他統計過平均至少一日才能完成一頁原創漫畫，「漫畫有對白有擺位，知道呢段說話要講啲咩時，畫出嚟嘅嘢就跟返啲對白嘅，諗對白等如度個劇本要時間，所以要配埋晒所有嘢，起碼要一日。」Danny又預告會繼續創作《西遊Go West》，「第3集出現咗好多唔同嘅人物，啲支線就會多咗，問我有冇第4集？我諗第5集都未必可以講完個故仔。」
簽名會上，Danny再有驚喜送給粉絲，即場宣布為配合第3集漫畫，同步推出全新單曲《凡間》，「第3集嘅第3個單元叫做《凡間》，我就係用呢個主題嚟作咗隻主題曲，《凡間》已經代表咗《西遊》呢個漫畫嘅主題曲，只不過之前第1集，我未曾諗到要作隻歌俾佢，到第2集我醞釀咗呢樣嘢，因為我每年都會寫張紙講我今年要做啲咩，咁我就決定作首歌畀第2集，呢首《凡間》已經算主題曲，將來仲會唔會作首插曲就唔知。」
Danny創作《凡間》時，連歌名都諗過度過，「初初有諗過用好煩個煩，但係唔係喎，佢哋四師徒嚟到呢個地球就係凡間，係用佢哋接觸凡間各樣唔好嘅嘢，包括戰爭，好多嘢都喺用佢哋視角講出嚟，當然我作為主筆都係我睇到嘅嘢。」原創漫畫堅持用手繪形式完成，但新歌《凡間》的MV，Danny反而找來出版商介紹而認識的AI高手Jason幫手，將原創漫畫《西遊Go West》以AI變成動畫，「漫畫我就唔會咁做，但係將來嘅方向係會向AI走，所以首歌嘅官方視頻就試下用AI幫手。」Danny還將這個剛完成的《凡間》MV即場舉行首播，粉絲睇得相當興奮。
更多圖輯：
