以前有句說話：「冇乜，傷風感冒之嘛。」唉，傷風感冒真係濕濕碎，從來未想過傷風感冒和生命有什麼關連。小時候感冒發燒，老媽子會到藥材舖買包欖茶，或者一塊神麴茶回來沖水或煲水服下，用大棉被焗一焗，當時身子在發燒，焗住張大棉胎還覺得凍，但大棉被加埋藥力，焗，焗，自然渾身是汗，老媽子下令不得踢被，像微波爐叮一叮那樣焗到油加汗全身濕淋淋。話都冇咁靈，當初頭重腳輕，辛苦到無倫，那汗一出又變得老虎都打死幾隻了。
長大了，常聽人說鬼佬好怕感冒，有的鬼佬會就咁拜拜。那時忽然間就出現民族自豪感，自覺我們中國人強人一等，有事只屬鬼佬的事，誰道二○○三年珍姐掌管生局那年，飛來了沙士，嘩，原來感冒可以冇藥醫。驚呀，真係好驚，驚到香港人雞飛狗走，連樓都要賣埋，搞到樓價大跌，跌到沉底，一場感冒搞到香港經濟幾乎崩潰。今年流感又再猖獗，又同珍姐扯上關係，珍姐係管晒全世界生巾幗鬚眉，點知又係咁黑，買紅開黑，落錯注。之不過以小人之見，今次唔怕，年沙士樓市大瀉，樓價衰過爛茶渣。而家樓市強勁，穩步飛起，毫無衰敗之勢，大家亦唔係咁驚，即係話未至會貼地，傷風感冒之嘛，頂得順。炮竹一聲，趕走晒霉氣。