佘詩曼自幼喪父，今個父親節，她在社交網貼上兒時與父母的合照，雖然照片質素模糊，阿佘亦坦言對爸爸印象同樣有點模糊，但她仍記得父親好貪靚，又自言遺傳了父親的貪靚、白淨皮膚。
阿佘有一名哥哥和一名弟弟，5歲時父親離世，三姊弟自幼與媽媽相依為命，昨晚罕有貼上父親的照片，並發長文留言：「今日係父親節，食完晚飯，碌吓個電話碌到呢張相，因為係四十幾年前嘅copy，所以有啲模糊…同我對我Daddy嘅印象一樣，有啲模糊。
「喺我個腦裏面嘅印象，Daddy係好貪靚嘅，日日出門口前都一定要gel頭，同埋噴香水。（我依稀仲記得佢嘅古龍水係咩味，係好Man嘅味道）呢樣嘢可能係我遺傳到佢嘅基因，貪靚～因為我媽咪係完全唔姿整嘅。
「另外，我daddy曬極都係白雪雪嘅，媽咪成日話我好識似，似daddy皮膚白，似媽咪對眼又大又圓，似Daddy work hard play hard. 似媽咪識得積穀防饑。雖然同Daddy嘅緣份只有五年多，但係都係嗰句，無佢無我。喺天上嘅你放心，我好好。Daddy父親節快樂！」
阿佘還貼了一張天空的照片，附言：「抬頭望到天空有粒閃閃下嘅星星，唔知係咪你呢…點都好啦，我派舊雲去錫啖你啦～」。