TVB全新旅遊節目《他們的澳洲駕期》請來兩組藝人老友自駕遊，分別有黎耀祥、曹永廉、蕭正楠的冬天之旅，以及吳若希、戴祖儀、丁子朗的夏日之旅。兩組人於不同季節出發，感受澳洲的壯麗風光，但不變的是自駕遊的驚喜——迷路、壞車、意見不合，考驗友情也照見人生態度。黎耀祥、曹永廉、蕭正楠因2016年劇集《公公出宮》成為好友，翌年拍攝旅遊節目《公公出埠》大受歡迎，三人「互相傷害」卻無損感情的互動令觀眾捧腹。相隔九年再度合體，默契與「毒舌」程度有增無減！
三位老友抵埗即殺入墨爾本南部市集歎生蠔，阿蕭激讚新鮮甜美。店主手舞足蹈表示多吃蠔可增強「Energy」，阿蕭即暗指阿廉需要「進補」，店主笑言吃完可變Superman，阿廉聞言急不及待連食多隻，邊食邊反眼露出享受樣，場面搞笑。
之後阿廉想買手信給兒子，即遭祥哥和阿蕭聯手夾擊：「平嘅買畀個仔，貴嘅買畀自己。」阿蕭更補刀：「唔怪得佢個仔咁反叛。」毒舌本色盡現。
三人漫步墨爾本皇家拱廊，感受悠閒氣氛。行到攰攰地，他們坐低把酒談心，祥哥有感而發：「自駕遊我覺得有少少似人生，自己路自己揀。」雖然現時各有各忙，阿廉表示每次見面仍有說不完的話題。
在維多利亞國家美術館，三人即席揮毫。阿廉畫了花花草草，阿蕭則畫了對自己別具意義的彩虹：「因為BB係彩虹嘅禮物。」祥哥自稱「用心畫」的作品想賣給阿廉，卻被阿廉寸爆冇創意，笑料不斷。
翌日早上七時，三人出發往滑雪勝地布勒山，卻遇上阻滯！負責駕車的阿廉搞極都啟動不了汽車，更發出「嗶嗶」聲，最終要落車求救。老外司機到座駕視察後，一個動作便成功撻車，阿廉即時被兩位老Best指住喪笑，場面尷尬又惹笑。
乘纜車上山頂後，三人玩起「唔准諗即刻答」——問題如「你哋之中邊個最鹹濕」，再用雪球掟中選之人。結果九成問題都是阿廉被掟，阿蕭笑言所有問題為阿廉度身訂造，更爆出阿廉曾出言「侮辱」他與太太黃翠如，坐實阿廉「三人中最毒舌」之位！結果阿廉被掟到發晦氣：「問咩吖？你都係掟我㗎啦！」場面爆笑。
之後三人乘坐由十隻雪橇犬拉動的雪橇，在雪地上飛馳。祥哥和阿廉坐在前方，阿蕭則與教練站在尾部控制方向，三人齊呼好玩刺激。阿廉笑言：「我覺得好享受，因為阿蕭喺後面。其實我都想試吓阿蕭喺前面拉，不過佢唔肯制。」貫徹其搞笑的毒舌本色，為旅程留下無數歡樂回憶。
