無綫全新旅遊＋訪談綜藝節目《人生美食地圖-東京篇》，由「最佳男主角」陳山聰、「飛躍進步男藝員」阮浩棕，先後夥拍日本美食達人陳方藤主，將帶觀眾深入日本東京大街小巷，尋訪地道美食。
第一周出擊的「人生美食家」有陳山聰與陳方藤，作為圈中知名潮人的山聰，早於20多年前已經常前往東京瘋狂購物，所以日本很多地方都充滿他的掃貨痕迹。在第一集，山聰一嚟便開懷分享昔日的「瘋買掃貨經」，他笑言當年為了慳錢慳時間，不但酒店住到豆腐膶咁細，就連三餐也相當求其，經常一個蘋果當Lunch就算，山聰說：「初初嚟日本，我真係唔會咁樣慢慢歎Lunch，因為多數時間都愛嚟行街‥‥‥我誇張到點，我試過袋住個蘋果去行街，Lunch肚餓食個蘋果㗎啫，跟住就繼續㗎喇。」為了幫山聰召喚珍貴回憶，製作組還帶他入住昔日的「蚊型酒店房」，讓他忍不住滔滔不絕大想當年。
山聰還到了當年的掃貨必到之處—代官山朝聖，他不但分享了當年在潮牌熱店排隊買衫的超瘋狂往事，還到訪了當年為了一件超貴價外套、在品牌店家門口徘徊「買與唔買之間」的案發現場；山聰還分享了自己如何為了靚衫、徹底沉船的驚人故事，「人生最長時間買件Tee用咗五個鐘頭，入到去冇嘢買㗎其實，求其見到咩都好啦，擸咗先‥‥‥仲有好多喺媽咪床下底，冇開過㗎‥‥‥我試過半夜瞓唔着，攞（件衫）出嚟掛喺度望，望一晚㗎可以。」
