來到日本，受不住誘惑，在廁所裏按下那個時常警惕，不要按下去的按鈕，一道暖流從下而上，愛撫你平時不願碰觸的部分，着實舒服。曾經掙扎了百千次，家裏要裝一個，後來有報告出來，指出這令你消魂的廁所板會令你百病叢生，咪制呀，因為沖上來的是暖水，暖水是細菌滋生的最佳溫牀，含菌的水噴入你下方要道，好易領嘢。嘩，咁得人驚，都係咪搞啦。唉，意志不堅，博佢冇事啦，唔怪得，唔怪得早前有祖國大叔大嬸，一用之下如獲重寶，三下五落二，拆佢落嚟，要搬返自己屋企，但轉吓頭就俾人捉住。呢個個案證明塊廁所板係二十四小時有人監視嘅，而且一定有閉路電視睇住。嘩，諗深一層，廁所裝閉路電視裝响邊度呀？咪乜都俾佢睇哂！係呀，只要佢鍾意睇邊度咪睇邊度囉。吓，會唔會裝响廁所兜裏面照上嚟呀？係噃，日本人好多心理唔係好正常，愈核突嘅嘢，佢哋愈趨之若鶩。肯定個鏡頭除咗影核突嘢，就連你彎低身拆嘢個樣都影埋啦，唔係點會捉人捉咁快而準呀！
講日本人核突，五十年前有個同學就親身經歷，是為佢終生最最遺憾之憾事，大逃亡時，同學投奔怒海來了香港，那時候南來的人，有工就做，乜嘢都做，他去了當紅牌車司機。一夜，响旺角接到一個客，一上車就坐車頭，問佢去邊？回答係嘰嘰㗎㗎。大劑，日本仔。冇辦法溝通，邊開車邊問清楚。誰料日本仔忽然伸手握住佢嗰度，佢大叫，日本仔唔理。慘啦，開住架車，左手要轉波，右手要揸軚，好不容易踢佢落車，成世人都覺得好蝕底。