景程被鮑姐嘅戲牽動，喊戲一Take過。
無綫台慶劇《下流上車族》昨晚一集，毓霞（鮑起靜飾）與家寶（林景程飾）兩母子關係再起變化。隨着狗狗次郎走失，似是有所頓悟的毓霞借意引家寶回家之餘，並透過視像請求新抱拍下她向親家老爺道歉片段。不諳日文的毓霞拿着寫滿中文拼音的貓紙，逐隻字以日文讀出內容，最終兩母子和好如初摟作一團齊齊淚崩，場面感人。
鮑姐講日文演戲都咁有戲，一字一句都流露住對阿仔嘅愛。
影后鮑姐昨晚再獻神級演技，就連以日文講對白都滲出陣陣戲味，講到這場日文道歉戲，鮑姐受訪時謂：「好彩當日有個幕後日文好叻，佢喺現場教我點講啲日文，即場教即場演，不過以前都有睇開日劇，所以啲音都係聽慣聽熟，所以好容易學。」問到講日語演戲會否影響情緒表達？鮑姐笑言：「其實只係將日文中文化（寫成中文拼音）嚟演繹，同埋角色本身日文唔叻，讀嘅時候梗會窒窒吓，但係為咗個仔唔識講都要講，呢個就係角色真實嘅情緒。」
鮑姐最勁係一埋位就入戲。
林景程受訪時透露拍攝該幕場口前特意獨處培養情緒：「不過正式拍嗰時冇想像中咁辛苦，因為100%畀鮑姐牽動咗個情緒，佢真係俾到一個老人家好用心去學日文嘅感覺出嚟，聽住佢讀嗰段日文好感動，我啲眼淚好自然咁流出嚟，拍之前冇設計過幾時要喊出嚟，完全係感受住鮑姐啲戲去演。」景程又指幸好該場喊戲一Take過便完成，並大讚鮑姐是神級演員：「鮑姐拍呢場戲前，仲同緊工作人員談笑風生，但佢一入咗個角色個情緒就已經喺度，佢唔係演緊個角色而係活緊個角色，每一場戲都令我嘆為觀止。」
羅毓儀同郭柏妍的女僕Look終於出場。
這集另一亮點，是郭柏妍（Rosita）、羅毓儀以女僕Look大跳可愛舞，兩大女神合體出擊賣萌，獲得網友一致好評。Rosita受訪時透露今次是人生女僕初體驗並大嗌好好玩，Rosita指事前跟毓儀上堂用了三小時學跳女僕舞，之後各自睇影片練習，Rosita說：「因為每日都要開工，搞到冇時間喺屋企練，有一日咁啱要拍醫院景，隔籬就係殯儀館景，我就咁喺殯儀館度練呢隻舞，開頭都有啲尷尬，覺得唔係幾好意思，但諗番只係個景嚟，唔使驚嘅！」
Rosita喺殯儀館景練舞。
