鄭嘉穎同陳凱琳在剛過去嘅周日在峇里結婚，婚後除咗留在當地度蜜月，仲要過埋十五號嘉穎嘅生日才返港！
十六號晚上十一點幾，春風滿臉嘅鄭生鄭太十指緊扣步出機場，現場傳媒當然要恭喜二人，嘉穎聽到鄭生鄭太四個字就笑到四萬咁口，「真係識講嘢！」陳凱琳就話：「我未慣，剛才機上派餐，聽到空姐叫鄭太唔係幾識反應，後來先知叫自己。」嘉穎就同老婆講：「慢慢就慣！」
問嘉穎有冇好消息公布？「有消息就會公布，未有。」佢仲話慢慢來，時間流流長喎！
陳凱琳就話奶奶冇俾壓力，一切順其自然！
講到接新新娘時，嘉穎重提好感動，娶到好老婆好開心，又講老婆叫佢現場唱《一次個願意》，佢話：「我經常喺屋企練歌，呢首係小弟嘅出道歌，佢好鍾意聽，所以一叫我唱嗰隻，我就知要唱乜。」最後，嘉穎被要求曬婚戒，二人十指再緊扣，然後嘉穎搭着老婆條腰慢慢離開。