鄭秀文新歌《心魔》MV今日（23日）正式上架，Sammi專程飛到泰國進行拍攝，亦是她首次到當地拍MV，導演、拍攝團隊、40位舞者及排舞師全是泰國陣容，分別在舊式劇院及郊外的校園取景。事緣Sammi曾在網上睇過一首歌的MV，好喜歡導演的拍攝風格，「入咗腦，記喺心裏，好大嘅憾動，如果搵到佢拍MV，一定可以將首歌昇華，多謝經理人搵到呢位導演，做到呢件事。」Sammi大讚整個團隊好專業，「我覺得係拍到呢首歌嘅靈魂，呢一點相當重要，我自己一路拍攝，某啲鏡頭我甚至會起雞皮，Dancers唔只係跳舞，佢哋身體嘅律動，都好多情緒喺入面，絕對幫我呢首歌畫面處理到真係極緻嘅狀態。」
這次拍攝行程相當緊密，Sammi黃昏抵達後，便立即返酒店進行試身，又要戴上MV中的長假髮進行修剪，翌日早上九時開工，身上的紋身貼紙，花了近45分鐘剪貼，在氣溫高達36度的悶熱外景場地，拍攝至凌晨一時。Sammi對每一個時刻、每一個場景都好喜歡，「其實好多唯美嘅畫面，亦有勾畫心魔嘅意境、意象，呢啲意象都係用人嚟堆砌，我哋搵咗40位Dancers去拍攝，即使係一個好簡單嘅動作，人多動作又齊整嘅時候，就有一種好強大嘅震動感覺。」
更多MV圖輯：
