陳奐仁
TVB新綜藝《魔音女團》日前進行海選，已令網民十分期待節目推出，但亦有部分網民質疑參賽女藝人故意扮唱得差。「班主任」陳奐仁（Hanjin）近日都在社交網為參賽者平反，留言：「真係走音唔係扮㗎」，並拍片親解原因。
Hanjin直言：「扮係會知，因為扮唱差會有演戲特徵，眼神會出賣。」除了資深演員都看得出外，他說聽也聽得出，但好難科學地解釋，因為是心理學的東西：「一個人特登唱得唔好聽，你會Feel到佢唔會盡力唱好佢囉，通常真係唱得差時會有啲位你會聽到佢係唱得盡力唱好佢，有希望嘅，可能就會有下一句。咁當然唱得唔好就冇下一句，但係專登唱差唔會俾自己去到一個有希望嘅位，呢啲幾明顯。憑我經驗，通常真係唔識得唱嘅，佢係出住力出錯嘅，假唱嗰啲呢，佢係Hea住或者啤住嚟出錯嘅。」
今日Hanjin再出片談到魔音走音最深刻的，是最尾出場的一位參賽者，他沒說對方名字，但照當日出場序，最尾的一位是胡敏芝。Hanjin表示：「走音嘅意思係離開咗旋律應該唱嘅音符，而佢唱極都唱唔中旋律，但最得意我係由頭開心聽到尾。（網上話唔係佢走得最勁？）咁我就唔知啦，我係用技術角度嚟睇走音，可能佢冇破音，但佢係搵極都搵唔到應該唱嘅音，就嚟搵到又過咗，其他人會唱下唱下唱到個旋律粒音起碼，跟住先去第二度，佢係冇一個位係上到軌道，佢一路Miss由頭Miss到尾，節奏又係一路Miss由頭Miss到尾。我諗我睇得舒服佢係一路好Focus好俾心幾去唱，冇停一停覺得好embarrassed，佢係好有誠意由頭唱到尾。」
