宣萱今日（4日）出席「與徐悲鴻的時空對話」活動，大會即場送上大師的駿馬畫給宣萱，據悉價值不菲，她表示收藏無價，「唔會諗買賣，我唔多收藏，但唔會諗價錢，我注重心意及心思，有時收埋又攞出嚟擺睇下，見到會諗起對方嘅心意。而我本身都好鍾意馬，記得拍《尋秦記》時成日喺大草原見到馬，我成個人都會好開心，我都會同佢哋傾偈，買蘋果餵俾佢哋食，而且馬對眼好靚。我對馬都會有一種親切感，屋企都有關於馬嘅佈置，因為我本身都信風水，風水馬係將財帶入屋，我花名叫神婆，都有搵師父睇風水，信就有，不信則無，屋企咩陣都有，睇得就要聽講，今年運程唔錯。」
對於有網民翻出當年在TVB時的影片，指她訪問中投訴有人拍劇遲到，「𠵱家睇返都幾愕然，自己點解會咁講嘢，但係後生可能讀書時老師會教唔開心就發表自己感受，有咩就要講出嚟，所以當時先會咁做，原來中國人社會可能會有少少出入。（當時可有被公司照肺？）都只係搵我傾吓偈，可能當時公司都覺得我難搞，因為控制唔到我。」
更多現場圖輯：
