魏浚笙（Jeffrey）昨晚（21日）現身愉景灣，為當地聖誕亮燈儀式揭開序幕，場面相當墟冚，大批粉絲及市民到場打卡。當璀璨燈飾亮起，全場歡呼聲此起彼落，氣氛瞬間變得浪漫又熱鬧。站在高達20米的金色玻璃城堡前，Jeffrey驚喜獻唱，首次現場演唱全新單曲《一生懸命》及《我的世界地圖》，其後更向粉絲派上「彩蛋」，即席清唱一段聖誕歌，令現場氣氛再度升溫。
活動後，Jeffrey大讚愉景灣充滿聖誕及異國風情，市集與燈飾非常吸引，直言十分推薦大家前來享受節日氣氛。他笑言自己一向鍾意聖誕節：「我好鍾意聖誕節，見到燈飾就會好開心，細個睇電影《Love Actually》就覺得好有聖誕氣氛，好鍾意呢套電影。」
被問到最想在哪裡度過聖誕，他毫不猶豫答：「最想去布拉格，因為嗰度有好多聖誕市集，如果將來有時間的話，都好想去嗰度過聖誕。」至於會否嚮往過二人世界，他笑說：「如果夾到屋企人都想一齊去，因為係一個好難忘嘅時刻，所以都想同屋企人一齊去。」
談到主演的新戲《殺手4》即將上映，Jeffrey坦言心情不算緊張，但非常期待觀眾反應：「希望大家聖誕節有嘢做或者冇嘢做都好，都可以同屋企人買飛入場支持呢套由我主演嘅電影。」他亦分享在日本拍攝時的難忘經歷。外界以為劇組每日行街食嘢，但現實是每日在零下氣溫拍攝十幾個鐘，來回車程各要四小時。他回憶道：「本身都唔怕凍，但都唔可以逞強，如果生病就會影響成個拍攝進度，大家都係咁食維他命C保持身體健康，係一個幾難忘嘅回憶。」
