《中年好聲音3》占士丁丁推出首支廣東派台歌《我的格言》，由張家誠監製及編曲，並與丁丁聯合作曲，林寶填詞，英文歌詞部分則由丁丁創作。丁丁日前為MV舉行首播禮，除有近百粉絲到場，還有圈中好友撐場，包括吳大強、李佳、羅逸軒、阮慧珊、善玥澄、曹越、劉曉昆、張家豪、陳智燊等。
丁丁送花答謝粉絲及嘉賓，他亦收到粉絲團「丁丁 Family」制作的巨型心意咭，「好感激大家咁真心接納我，真係當我家人一樣，照顧埋我起居飲食，譬如我病咗會幫我買藥；我聲沙又會買蜜糖畀我；換季又會幫我準備衫褲鞋襪；仲成日買地道美食畀我食，就好似歌詞『喉嚨惹上目光，我又想起甚麼，不安裏你路過，竟欣賞一個我』，好榮幸得到佢哋愛錫，所以一定要同佢哋一齊分享呢份喜悅。」
更多首播禮圖輯：
丁丁形容《我的格言》是送給香港人的情書，因為留港發展以來，一直得到滿滿的愛，「我嚟到香港由Busking開始，一直得到好多香港人嘅鼓勵同支持，話畀我聽我唱歌係好聽，到我參加咗《中年好聲音3》，又會成日喺街上聽到：『丁丁我支持你！』，令我更有動力幾日就學一首中文歌，所以我係真心愛香港同香港人，因為冇大家就冇今日嘅占士丁丁，所以我有機會出自己嘅歌，好想透過《我的格言》好好多謝返香港人，就好似首歌嘅歌詞一樣『多感激你能真心接納我』。」
對於推出首支廣東歌，心情興奮，「我由細到大夢想就係做歌手推出自己嘅歌，10幾歲開始周圍唱歌，但一直以為呢個只係不可能嘅夢想，估唔到喺香港可以真係實現到呢個夢想，所以只要肯努力同埋得到大家支持，不可能都可以變成可能。」不過廣東話只屬「有限公司」的丁丁，錄音時有一定難度，「雖然首歌我有份作曲同寫英文部分歌詞，但唱廣東話真係好難，首先要了解每個中文字意思去投入感情，到正式錄音時監製張家誠要不斷執返啲咬字，所以都花咗好幾日時間先錄好首歌。」
講到《我的格言》的MV，丁丁亦有參與意見，希望拍出他在港生活的寫照，「經常喺街見到啲婆婆、公公、叔叔、或者學生哥同我打氣，就算佢哋有啲唔識英文，都會拍吓我膊頭或者畀個like同我加油，我想拍出嚟話俾大家聽我係感受得到，多謝大家。」
更多MV圖輯：
