譚詠麟《經典傳奇巡迴演唱會》最終站將於12月在澳門舉行，日前校長為演出進行綵排。自2015年《銀河歲月40載》開始，再到《經典傳奇》，校長已連續10年舉行巡迴演唱會，到過多個城巿與歌迷聚會，他驚訝歌迷層面極之闊，「佢哋嘅層面好犀利，有好多係廿五對，亦有廿五歲，連廿五歲以下都有，我覺得好奇怪問返佢哋，佢哋話叫『懷疑爸爸，了解爸爸，然後成為爸爸』，呢句話點解呢？就係懷疑爸爸點解會咁鍾意譚詠麟，跟住去了解爸爸學聽爸爸聽嘅歌，聽到啲歌咁好聽，於是變成同爸爸一樣嘅喜好。」
每站巡迴演唱會，校長坦承去到尾聲都會很不捨，尤其是是安哥部分，歌迷的忘情投入度，無論精神上與實際上的付出都不少，「每個舉動都係代表支持，深深感激佢哋咁多年嚟嘅支持，真係非常之入心。」因歌迷表現令校長太感動，到安哥時都會撐不住，「真係唱唔到落去，因為會變晒聲，控制唔到，連個key都捉唔住，所以有時候係佢哋唱畀我聽。校長預告每一站演出，都會因應當地民情在內容上作出調整，澳門站亦不例外，但就大賣關子，「預告唔到咁多，變動一定會變，希望大家睇得開心啦！」他提醒歌迷要準時入場，「早啲入場可以聽足啲，同埋喺現場記得有咁投入就咁投入，同我一齊大合唱，唱爆個館。」
更多圖輯：
