Sophie與GM配對成功後，主動提議GM玩「同心鎖」，Sophie選擇寫下的，是她在第一天海選時說過的霸氣Bite：「我唔需要嗰5秒」，至於GM寫下的則是一生不變愛的承諾：「你係第一個，（亦係）最後一個我會想用盡全力保護嘅人。」網民亦紛紛留言表示感動及祝福，當中有謂：「見到這一pair，突然間諗起張家輝和關詠荷，GM係張家輝2.0」。更令人驚艷的是，來自18個城市的GS粉絲，為GM及Sophie準備了一個「官宣應援」，由今日開始於旺角投放一星期。應援官宣內容：「愛不僅是剎那間的心動，更是長久凝視彼此靈魂後的選擇，恭喜GM和Sophie，選擇在對方眼中安放自己的世界。」
說回慶功宴現場，3對成功配對的CP，以不同形式進行「愛的官宣」。GM與Sophie應全場要求即場還原世紀之吻，原本GM有點害羞，不斷採取拖字訣，但最後敵不過全場起哄，「十秒！十秒！」，GM最終把心一橫捉實Sophie雙臂，二人開始在熱鬧的十秒倒數聲音下錫錫；但搞笑的是，當倒數至三時，Sophie突然向後縮兼怕醜地雙手掩面，獲監製起哄大叫：「要重頭嚟過！」GM聞言搞笑崩潰大叫：「夠喇！」可惜還是遭監製再三要求redo，最終GM搞笑向監製下戰書：「你再講我錫你呀！」場面混亂又搞笑。最終幾經「喧鬧」，GM再度主動捉實Sophie手臂並溫柔地吻向Sophie額頭，並於極短時間內連錫4吓，此時頑皮的監製又起哄：「錫埋塊面啦！」GM亦「順攤」地連錫Sophie面珠仔4吓，如此甜到漏，難怪不少網民大讚是新婚現場。
眾人睇完大結局，再前往After Party慶功，席間Sophie GM再度大耍花槍！事緣眾人直播期間，又再起哄大叫GM Sophie錫錫，被起哄之聲吸引入鏡的Sophie，隨即搞笑地大叫：「GM，過嚟！」之後再搞笑地「霸氣捧」GM面，並「強行」吻向GM面珠，結果成功引發全場起哄，受寵若驚的GM更要「飲水定驚」，相當好笑。之後，二人又徇眾要求合唱GM海選時的面試歌曲《情非得已》；期間二人遭起哄拖手，結果因為GM太害羞，最後又是要Sophie主動伸出玉手讓GM拖。
Sophie接受娛樂新聞台訪問，被問到為何在「最後告白」中「一秒轉身」鎖定GM，她笑言：「因為由開始到依家都考慮咗好耐啦嘛，咁我覺得我個人就係『係就係，唔係就唔係！』決定咗就做囉！」GM則坦言未被揀中一刻，心情都依然忐忑：「我都冇乜心情睇佢哋（其他求愛勇者），我都囉囉攣……其實（我）都唔係講咗好多（嘢），因為我（當時）好亂。」Sophie：「其實頭先有all in 嘅感覺。」另Sophie及GM還透過tvb官網甜蜜謝票，Sophie：「我一開始知道要做真人騷呢，我就已經想送呢份禮物俾你哋啦。就係『真』！的確有啲戀綜係有劇本嘅，咁我覺得自己作為一個Artist，送俾觀眾嘅嘢就係真實感。所以全程我都堅持係……真實咁去感受，將自己成個人揼晒落嚟嘅，我希望你哋（觀眾）會鍾意我送俾你哋嘅呢份禮物，多謝你哋一路支持！」
