專欄 黃偉文
熱門文章
黃偉文
BUY ME A LITTLE SUNDAY
ADVERTISEMENT

黃偉文專欄:啲靚人去晒邊?

27.09.2018
我們都明白,天意愛弄人,你最想碰見的那個人,總是在你「擤緊鼻涕」「唇邊有餅碎」或者「被一陣怪風吹亂髮型」那個黃金一刻才碰巧看你一眼的。
回到去「啲靚人去晒邊?」這個問題上,如果以前巴黎有過Colette附近那截Rue Saint Honoré,東京仍然有整個原宿南青山甚至整個涉谷區,那麼香港呢?

如果「時裝精」真是個學術銜頭,主修科目大概是「睇衫」「買衫」和「襯衫」吧!學懂了理論後,走出課堂”to see and to be seen”,就算不是Internship至少都是field practice,總之唔做過都幾難畢業。

咁問題嚟嘞!喺香港,去邊度睇靚人(同俾人睇吓自己夠唔夠靚)最好?啲靚人去晒邊?

華山論劍都要有座華山至得㗎?

咁華山呢?

不是什麼事都可以上網做的

社交網絡發達之後,好多人都「去咗另一個世界」。時裝精的「睇人與被睇」活動早已移師網上進行,對我來說,唯一的好處是「不用撞彩」,是的,古時大家著到靚靚走上街等人望和搵人望,大概都得先規劃一個路線圖,想想星期幾什麼吉時由邊度走到邊個大利方位,中途在邊度停站飲茶煲煙逛街才能撞見最多的「目標觀眾」(是的,不是「任何人」,只有認得出你那件斗篷是當季Jean Paul Gaultier FW1990的「識貨者」才計分),否則也就浪費了那天打扮的一擔心機。

但自從有了互聯網,在物理世界錯過了你「倩影」的潛在收視率,都可以透過你自己貼在Facebook、Instagram上面的selfie或真假街拍「撈返」,總之要睇到你的遲早一定搵到嚟睇,完全唔駛碰運氣!

而你呢,當然可以把自己用各種工具執到120分才出post,不但保證他們能見到,還可以控制「怎樣被見到」……我們都明白,天意愛弄人,你最想碰見的那個人,總是在你「擤緊鼻涕」「唇邊有餅碎」或者「被一陣怪風吹亂髮型」那個黃金moment才碰巧看你一眼的。

然而,靠「社交平台」to see and to be seen的好處就真是只得這麼多了!

大家都忘記了或者不再care了,人與人之間的邂逅還是透過實物進行才夠震撼才夠刻骨銘心吧!

人肉沙龍

即使只一格,經典的偶遇已不再,但是時裝精之間彼此用眼睛留住溫度速度溫柔和憤怒的例子,這麼多年來,我還是隨口便能數出三五七個的。

沒有手機鏡頭硬生生地記下,但被記憶修飾過才錄下的印象總是遠遠的更動人。

有次在巴黎Colette地面賣Street Fashion那一層,忽然有個三十歲左右長得並不合乎主流審美的法國男子走進來,全身穿戴的都不是新衣更非名牌(為什麼我能看得出「不是新衣」和「非名牌」?Come on!這點功力我還是有的好不好!),卻好看得驚人!其實是我平時覺得很「時裝Cliche」的「由頭黑到落腳」,略殘的黑色V領tee、略殘的黑色鬆身軍褲、略殘的黑色Jordan第4代波鞋,重點是外面襯了件勁殘的黑色tuxedo jacket,前短後長真係燕尾嗰隻,再一手拎一個略殘的黑色電單車頭盔,好似再另一手拎住個入住食物同礦泉水嘅超級市場膠袋,好似啱啱去買完餸好不經意咁行入嚟打書釘(我當然知佢唔係等閒之輩亦唔係唔覺意喺呢個鐘數入嚟呢度啦!)

不過我當時都唔理得咁多,心裏面被點着的唯一慾望是「我要即刻去二手舖搵件Vintage Swallowtail Tuxedo ! 」仲要當佢最casual嘅外套咁襯!

時為2001年左右,總之遠遠早於各大品牌把踢死兔帶回潮流中。

又有次在表參道青山通交界那個十字路口,我們只有一條斑馬線的時間,他朝北我向南,他紮了個古裝浪人披頭散髮的鬆髻,穿了條都幾爛吓的藍色torn jeans加人字拖,上面是grand-dad collar的麻質白恤衫,犀利的是他外面罩了件半舊和式浴衣Yukata,黑底粉紅花,而他居然有本事french tuck了那件衫,即是瀟灑地把那件拖地長度的和服前幅「攝」了一半入褲頭,又「拋」返少少山來做draping!我當時決定在那兩秒間啟動自己的photographic memory,記實呢種前所未見的著法並回去模仿!吓,你話「好前所未見咩」?係呀!當時係2003年喎!

回到去「啲靚人去晒邊?」這個問題上,如果以前巴黎有過Colette和附近那截Rue Saint Honoré,東京到今日仍然有整個原宿南青山甚至整個涉谷區,那麼香港呢?

香港還有沒有這個”to see and to be seen”的勝地呢?唔係人多就算「勝地」喎,要靚人夠多先算「聖地」喎!

如果你問而家,我真係要諗一諗!

如果你講以前,我都仲記得一兩度,下期可以同大家交換notes。

(未完下期續)

延伸閱讀
熱門搜尋
袁國勇 出版自由 展覽 環保 食譜
https://www.mpweekly.com/culture/wp-content/uploads/2018/09/MPW2603_B070-071_001_crop-150x150.jpg