明周文化
熱門文章

【情緒展覽】覺得唔好無乜唔好 用溫度打開心扉

3151

當別人問How are you,你係咪通常機械地回答fine,即使你唔多fine?最近有個展覽提倡It is fine to be not fine,由推廣精神健康的組織「說書人」及Secret Tour合辦,打破要時刻保持正能量的迷思。

%ef%bd%92%ef%bd%85
學校展區的熱感紙下都是學生心聲,有暗戀的故事,也有跟升學有關的故事。

兜口兜面被問你好嗎,實在好難開口講心嗰句。傷心寂寞無助恐懼憤慨唔上唔落kick住kick住,萬言億語不知從何說起,更怕對方唔想聽。主辦單位早前在網上收集超過3,000個香港人對於How Are You?這個問題的答案,並將部分答案展出。對於收集到咁多答案,Secret Tour主理人Stephen覺得相當意外。「首階段已收到800幾個回覆,之後我們出咗個網站宣傳呢個活動,叫人答How Are You?攞入場門票,結果有成2200幾個,而且答得詳盡的多過短短一句好多,我都會諗點解咁多人湧過來。」不記名讓人寫寫寫寫寫,暢所欲言,回應踴躍,反映很多人平日沒有宣洩的渠道。「說書人」創辦人之一,香港中文大學心理學教授麥穎思說:「我諗大家當呢次機會係樹窿咁。我哋唔慣講唔開心嘅嘢,怕被人覺得自己係弱者。今次主題係not fine,想強調人生總有起伏,好想正常化呢件事。」

don181210jenny-27
(左)Secret Tour主理人
(右)「說書人」創辦人,香港中文大學心理學教授麥穎思

展場分為三個展區:學校、睡房、辦公室,聲稱每個場景都有相關內容。但記者一眼望晒,只覺好鬼blue,展品到底在哪?不敢向人剖白的心底話,當然不易被看見,原來心聲都隱藏於熱感紙之下。想睇到就要用手捽捽捽捽捽,寓意打開別人心扉要靠溫度。Stephen表示:「人與人溝通是有溫度的,更加需要耐性。」

don181210jenny-10
很多心聲都看得人心酸,似乎大家都欠缺抒發的途徑。
don181210jenny-8
用手來回塗抹,心底話才會顯露,比喻溝通、傾聽需要耐性。

記者捽開睇到某啲心聲,都幾震撼,感受到寫的那位非常無助。麥穎思指今次展覽可以讓參觀者看到每個人都有”Not Fine”的時候。Stephen說:「當你發現有人情況同自己差唔多,的確會覺得無咁孤單。」

他發現身邊愈來愈多朋友飽受情緒困擾,所以希望推廣關注精神健康。「感受好深嘅係點解呢個城市,連十歲八歲小朋友都有困擾。呢幾年大家多咗接觸呢類資訊,但當自己或身邊人有困擾,往往唔知下一步應該點做。」他說搞這個展覽,跟麥教授多聊天,才明白聆聽的重要。「好多時我哋聽人訴苦都係為咗『講嘢』,好想幫對方解決問題,我依家學識真係靜靜地聽,一句都唔講,陪下佢或者已經夠。」麥穎思補充:「事實上有人肯聽已經舒服好多。」展覽的三個場景都有一部電話,參觀者拿起聽筒按掣,會聽到不同人的真實經歷,是個很好的聆聽訓練。

don181210jenny-23
我們都應學習放下批判聆聽。
don181210jenny-22
場內展板提供成為聆聽者的要訣,包括放下批判心、不要急於發表意見等。
don181210jenny-14
互動碎紙機裝置,讓人閱讀別人心聲後碎掉。碎掉的動作不是否定,而是代表用心了解後,好好消化對方的經歷。
don181210jenny-17

I Am Not Fine Exhibition
日期:即日起至12月16日
時間:中午12時至晚上7時
地點:PRESET,香港中環威靈頓街33號G/F

延伸閱讀
熱門搜尋
袁國勇 出版自由 展覽 環保 食譜
https://www.mpweekly.com/culture/wp-content/uploads/2018/12/re-150x150.jpg